Bachgen, 13, yn arwr wrth i'w fam lewygu wrth y llyw
- Cyhoeddwyd
Mae'r bechgyn yn ddisgyblion Ysgol Y Preseli yng Nghrymych
Mae bachgen 13 oed o Geredigion wedi dweud sut lwyddodd i lywio car ei fam i lain galed yr M4 wedi iddi hi lewygu tra'n gyrru ger Abertawe.
Roedd Hari, 13, a'i ffrind Dylan, 12, ar eu ffordd adref o sesiwn hyfforddiant yn Academi Bêl-Droed Dinas Abertawe bythefnos yn ôl, pan wnaeth mam Hari lewygu wrth y llyw ger Cyffordd 47.
Fe wnaeth Hari, oedd yn eistedd ym mlaen y car, gydio yn yr olwyn, newid gêr y car, a'i llywio'r car i ddiogelwch.
"O'n i'n dod 'nôl o training, ac o'dd fi a Dylan ar y ffôn a nath mam jyst passo mas," meddai Hari o'r Ferwig ger Aberteifi.
'Gyrru tua milltir'
"O'n i'n meddwl am fy wncwl ar y fferm," medd Hari am sut lwyddodd i lywio'r car
"O'dd y car wedi dechrau mynd i'r dde. Nes i grabbo'r steering wheel a tynnu fe 'nôl i'r chwith ac wedyn rhoi e ar yr hard shoulder.
"'O'dd Dylan wedi dweud wrtho fi roi'r goleuadau rhybudd ymlaen a tynnu'r brêc llaw.
"Eithon ni mas o'r car ac o'n i wedi treial cal help, ac o'dd Dylan wedi ffono dad fi.
"Galle fe wedi bod yn ddamwain oherwydd roedden ni ar slipffordd yn arwain at gyffordd gwahanol."
Roedd mam Hari'n gyrru ar yr M4 ger Abertawe pan wnaeth hi lewygu
Llwyddodd Hari i gael sylw gyrrwr ar yr M4 ac fe wnaeth Dylan, o Aberporth, alw ei dad am gymorth.
Cafodd mam Hari ei chludo i Ysbyty Treforys.
Pan ofynnwyd iddo sut y llwyddodd i yrru car ei fam, dywedodd Hari: "Sai'n gwbod, o'n i'n meddwl am fy wncwl ar y fferm o'r blaen."
Fe wnaeth Dylan helpu Hari i ddiogelu'r car
Mae'r daith rhwng y gorllewin ac Abertawe yn un gyfarwydd i'r Hari a Dylan gyda'r ddau yn teithio i academi Abertawe hyd at bum gwaith yr wythnos.
Fe wnaeth Dylan weiddi cyfarwyddiadau i Hari o'r sedd gefn.
"'Naeth Hai ddal yr olwyn yn gyflym iawn i fod yn deg iddo fe," meddai Dylan.
"O'n i'n shocked ond bach yn prowd a hapus pan oedd e drosodd.
"Mae pawb yn yr ysgol wedi bod yn gofyn i ni beth ddigwyddodd."
'Ysgol falch iawn'
Mae'r ddau yn ddisgyblion yn Ysgol y Preseli yng Nghrymych.
Dywedodd y pennaeth dros-dro, Carwen Morgan-Davies, fod yr ysgol yn falch iawn o'r bechgyn.
"Ni'n browd iawn fel ysgol o ymateb cyfrifol Hari a Dylan bythefnos yn ôl ar yr M4.
"'Naethon nhw ymateb yn slic i sefyllfa heriol iawn, a 'naethon nhw gymryd cyfrifoldeb personol.