Hosbisau Cymru i dderbyn £2.2m ychwanegol gan y llywodraeth

Mae hosbis Tŷ Gobaith, ar lannau Afon Conwy, yn costio tua £2.5m y flwyddyn i'w redeg

Bydd £2.2m ychwanegol ar gael i hosbisau fel rhan o adolygiad Llywodraeth Cymru ar ofal diwedd oes.

O ganlyniad bydd £888,000 yn mynd i'r ddwy hosbis blant, Tŷ Hafan a Thŷ Gobaith, gyda'r gweddill ar gyfer gwasanaethau hosbis i oedolion ledled Cymru.

Yn ôl y Gweinidog Iechyd daw'r cyllid ar ben yr £13.8m a ddyrannwyd gan Lywodraeth Cymru i gefnogi'r sector a chryfhau'r gwasanaethau cymorth mewn profedigaeth gydol y pandemig.

Cyn dyfodiad Covid-19 roedd tua dwy ran o dair o incwm hosbisau yn dod o weithgareddau codi arian, ond darparwyd arian ychwanegol i'w cynorthwyo yn sgil colli'r incwm yr oeddent yn arfer ei godi drwy weithgareddau elusennol.

• 'Bydden i ddim wedi gallu 'neud heb hosbis'

• Toriadau'n bosib heb ragor o arian, medd hosbisau

Yn cyhoeddi'r cynllun diweddaraf, cadarnhaodd y gweinidog Eluned Morgan y bydd ail gam yn edrych ar ddarpariaeth gofal diwedd oes yn ehangach o fis Ebrill 2022 ymlaen.

"Mae hosbisau'n rhan hanfodol o'r gwasanaeth gofal iechyd yng Nghymru," meddai.

"Maen nhw'n darparu gofal hollbwysig i fwy na 20,000 o bobl yng Nghymru bob blwyddyn sy'n cael eu heffeithio gan salwch terfynol, ac yn helpu i atal pobl rhag cael eu derbyn i'r ysbyty'n ddiangen.

"Ni fu erioed fwy o angen y gofal hwn nag yn ystod y ddwy flynedd ddiwethaf. Gydol y pandemig, mae hosbisau wedi bod yno i gefnogi cleifion, teuluoedd a gofalwyr drwy'r amser anoddaf iddynt ac o dan yr amgylchiadau anoddaf hefyd."

Agorodd Tŷ Hafan, ym Mro Morgannwg, yn 1999

Dywedodd prif weithredwr hosbis blant Tŷ Hafan, Maria Timon Samra, ei bod yn croesawu ymrwymiad y llywodraeth.

Ychwanegodd: "Rydym yn edrych ymlaen at barhau i weithio gyda nhw i greu Cymru sy'n fwy tosturiol a sy'n cefnogi plant â chyflyrau sy'n cyfyngu ar eu bywydau, a'u teuluoedd.

"Yn aml, ein hosbisau yw'r unig le y gallant dderbyn gofal a chymorth mewn argyfwng, a chael seibiant."

Disgrifiodd Andy Goldsmith, prif weithredwr hosbis Tŷ Gobaith, y cyllid ychwanegol fel "cam cyntaf mawr ymlaen o ran sicrhau bod y cymorth gwerthfawr y mae hosbisau plant yn ei ddarparu ar gael i bob plentyn a theulu sydd ein hangen".