Pencampwriaeth y Chwe Gwlad: Cymru 9-13 Ffrainc

Jonathan Davies yn ymdrechu'n galed yn ystod y gêm yn Stadiwm Principality

Colli wnaeth tîm rygbi Cymru nos Wener a hynny yn erbyn Ffrainc - yr unig wlad sydd wedi ennill pob gêm ym Mhencampwriaeth y Chwe Gwlad hyd yma.

Dechreuodd Ffrainc y gêm yn hyderus ac ar ôl tair munud roedd cic gosb Melvyn Jaminet wedi rhoi'r Ffrancwyr dri phwynt ar y blaen ond ymhen dwy funud yr oedd troed Dan Bigger wedi dod â'r sgôr yn gyfartal.

Roedd Ffrainc yn ennill y gêm gicio yn yr ugain munud cyntaf.

Anthony Jelonch yn sgorio i Ffrainc

Wedi 10 munud, cais cynta'r gêm a hynny wedi i Anthony Jelonch, y blaen asgellwr, groesi'n rhwydd ac fe ychwanegodd Jaminet y ddau bwynt.

Ond doedd y cochion ddim yn ildio - ymhen saith munud roedd yna gic gosb arall i Dan Biggar wedi chwarae da gan Alex Cuthbert a Taulupe Faletau a 39 munud i mewn i'r gêm roedd yna drydedd gic gosb i Biggar.

Pan ddaeth y chwiban hanner amser dim ond un pwynt o wahaniaeth oedd rhwng y ddau dîm - Cymru 9, Ffrainc 10.

Fe sicrhaodd cicio cywir Dan Biggar nad oedd llawer o bwyntiau rhwng y ddau dîm

Cic gosb i Melfyn Jaminet a hawliodd bwyntiau'r ail hanner i'r Ffrancwyr.

Wrth i'r gêm fynd yn ei blaen roedd tîm Cymru yn chwalu hyder Ffrainc ac roedd ambell gamgymeriad gan yr ymwelwyr. Ond er hynny roedd gweld o ble y deuai sgôr i Gymru yn anodd. Daeth Jonathan Davies yn agos ond fe gollodd ei afael ar y bêl a chollwyd y cyfle.

Doedd dim sgôr bellach ac felly y Ffrancwyr oedd yn fuddugol o bedwar pwynt (9-13).

• Cymru v Ffrainc: 'Cost tocynnau a theithio ar nos Wener yn heriol

Y gêm yn erbyn Ffrainc oedd y bedwaredd i Gymru yn y Chwe Gwlad eleni, wedi iddyn nhw gael eu trechu gan Iwerddon a Lloegr, ac ennill gartref yn erbyn Yr Alban.