Chwe Gwlad 2022: Cymru yn croesawu'r Eidalwyr yn y gêm olaf

Dan Biggar fydd yn gapten ddydd Sadwrn, er fod y capten arferol, Alun Wyn Jones, yn ei ôl

Bydd Cymru yn herio'r Eidal yn y Chwe Gwlad ddydd Sadwrn gyda dim ond balchder yn wobr i'r enillydd yn dilyn ymgyrchoedd siomedig.

I fod yn deg, mae perfformiadau Cymru wedi gwella wrth i'r gystadleuaeth fynd yn ei blaen.

Cafwyd perfformiad llawer gwell gan Gymru - sy'n bumed - yn y golled yn erbyn Ffrainc.

Fe all Cymru orffen yn drydydd gyda buddugoliaeth pwynt bonws ac os bydd canlyniadau eraill yn mynd o'u plaid.

Mae'r Eidal - a fydd unwaith eto yn gorffen ar waelod y tabl - yn chwilio am eu buddugoliaeth gyntaf yn y Chwe Gwlad ers 2015 i ddod â rhediad truenus o 36 colled yn y gystadleuaeth i ben.

Mae Cymru wedi curo'r Eidal ym mhob un o'r 16 cyfarfod diwethaf.

Y clo Alun Wyn Jones fydd y chwaraewr cyntaf i gyrraedd 150 o gapiau dros un wlad, a'r capten Dan Biggar fydd y seithfed chwaraewr o Gymru i gyrraedd 100 o gapiau.

Dyma fydd y tro cyntaf i Jones chwarae ers anafu ei ysgwydd yn erbyn Seland Newydd yng ngemau'r hydref.

Dyw Alun Wyn Jones ddim wedi chwarae gêm gystadleuol ers anafu ei ysgwydd yn erbyn Seland Newydd ar 30 Hydref y llynedd

Mae Alun Wyn Jones wedi ei dweud ei bod hi'n "anrhydedd ac yn fraint" wrth iddo baratoi i ennill ei 150fed cap i Gymru a chreu hanes yn y gamp.

"Mae bod y cyntaf i wneud unrhyw beth yn anrhydedd ac yn fraint," meddai Jones.

"Ond dwi'n meddwl bod gwneud hynny dros Gymru a thynnu'r crys yma ymlaen gymaint o weithiau... yn enwedig pan fyddwch chi'n sylweddoli beth mae rygbi yn ei olygu i'r genedl.

"Rydw i wedi bod i ffwrdd o'r camp ac allan o'r crys ers rhy hir, ond mae dod yn ôl i weld y gwaith caled mae'r bechgyn wedi ei wneud wedi bod yn bleserus iawn."

Tîm Cymru i wynebu'r Eidal - dydd Sadwrn, 19 Mawrth am 14:15

Johnny McNicholl (Scarlets); Louis Rees-Zammit (Caerloyw), Owen Watkin (Gweilch), Uilisi Halaholo (Caerdydd), Josh Adams (Caerdydd); Dan Biggar (Northampton Saints, capten), Gareth Davies (Scarlets); Gareth Thomas (Gweilch), Dewi Lake (Gweilch), Dillon Lewis (Caerdydd), Adam Beard (Gweilch), Alun Wyn Jones (Gweilch), Seb Davies (Caerdydd), Josh Navidi (Caerdydd), Taulupe Faletau (Caerfaddon).

Eilyddion: Bradley Roberts (Ulster), Wyn Jones (Scarlets), Leon Brown (Dreigiau), Will Rowlands (Dreigiau), Ross Moriarty (Dreigiau), Kieran Hardy (Scarlets), Callum Sheedy (Bryste), Nick Tompkins (Saracens).