Gemau Invictus 'wedi achub bywyd' cyn-filwr Cymreig

"Ro'dd e'n sioc i'r system ac fe arweiniodd ataf fi'n ceisio lladd fy hun deirgwaith."

Bu'n rhaid i Craig Godsall, 30, adael y Gwarchodlu Cymreig ar ôl dioddef anaf i'w gefn yn Kenya.

"Bob un tro, bues i'n ffodus bod rhywun wedi cyrraedd mewn pryd a mynd â fi i'r ysbyty," meddai.

Y penwythnos hwn, mae Craig, sy'n byw yng Nghasnewydd, wedi teithio i'r Hâg yn Yr Iseldiroedd, i gymryd rhan yn y Gemau Invictus.

"Rwy'n meddwl ei fod wedi fy achub," meddai, "y gefnogaeth, y cwnsela, cael rhywbeth i anelu ato, mae wedi newid pethau yn llwyr."

Bu'n rhaid i Craig (dde) adael y Gwarchodlu Cymreig yn dilyn anaf i'w gefn a gafodd tra'n gwasanaethu yn Kenya

Mae'r pumed Gemau Invictus yn dechrau ddydd Sadwrn, ar ôl cael eu gohirio yn 2020 a 2021 oherwydd y pandemig.

Bydd dros 500 o gystadleuwyr o 20 gwlad yn cystadlu - pob un yn aelodau o'r lluoedd arfog sydd wedi'u hanafu neu yn sâl.

Maen nhw'n cymryd rhan mewn deg camp - athletau, codi pwysau, saethyddiaeth, rhwyfo dan do, her yrru Land Rover, pêl-fasged cadair olwyn, rygbi cadair olwyn, beicio, pêl-foli eistedd a nofio.

Crëwyd y gemau gan y Tywysog Harry yn 2014 gyda'r nod o ddangos bod chwaraeon yn gallu "ysbrydoli adferiad, cefnogi adsefydlu ac i ddangos bywyd y tu hwnt i anabledd".

Tywysog Harry gyda chwaraewyr rygbi cadair olwyn yn ystod y Gemau Invictus cyntaf yn Llundain

Cymerodd Craig ran mewn treialon ar gyfer y gemau yn Sheffield flwyddyn yn ôl cyn ymgeisio.

"Roeddwn i'n poeni tipyn wrth aros am yr e-bost i weld a oeddwn wedi cael fy newis," meddai.

"Roedd rhyw 300 o bobl wedi ymgeisio cyn i 65 gael eu dewis, felly roedd hynny'n eithaf arbennig."

Craig Godsall yn ystod ei gyfnod gyda'r Gwarchodlu Cymreig

Bydd ei ragbrofion, 100m a 200m, fore Sul ac os ydy o'n llwyddo, bydd yn cystadlu ddydd Llun.

"Mae yna ryw fath o fuddugoliaeth wrth jesd cyrraedd yma.

"Rydan ni wedi mynd trwy cyfnodau da a drwg, rhai isel iawn, dim ond er mwyn cyrraedd. Mae unrhyw beth ar ôl hynny yn fonws."

'Cyffrous - a nerfus'

Nid Craig yw'r unig aelod o Gymru o Dîm Invictus UK.

Mae Beth Langley, 30, o Dregaron yn un o ddau ffisiotherapydd y tîm.

Beth Langley yw un o'r ddau ffisiotherapydd sy'n gofalu am dîm y DU yn y gemau

"Rwy'n gyffrous iawn am y peth," meddai. "Fi 'chydig yn nerfus, oherwydd dyma fy ngemau cyntaf.

"'Sa i'n newydd i fyd physiochwaraeon, ond rydw i'n teimlo fy mod i wir eisiau i'r cystadleuwyr gael amser da ac rydw i eisiau gwneud fy ngorau drostyn nhw.

"Mae'n mynd i fod yn heriol oherwydd mae yna lawer ohonyn nhw a dim ond dau ohonon ni physios!"

Bydd Gemau Invictus yn parhau tan ddydd Gwener 22 Ebrill.