Dyn 41 oed yn marw yn dilyn gwrthdrawiad ym Mhowys
- Cyhoeddwyd
Roedd y beiciwr modur yn teithio tua'r gogledd i gyfeiriad pentref Tretŵr
Mae dyn 41 oed wedi marw yn dilyn gwrthdrawiad ar yr A479 yn ne Powys dros y penwythnos.
Cafodd y gwasanaethau brys eu galw i ardal ger pentref Tretŵr tua 08:40 ddydd Sadwrn yn dilyn adroddiadau o wrthdrawiad rhwng beic modur Ducati a fan Mercedes Vita glas.
Bu farw'r beiciwr modur, oedd yn teithio tua'r gogledd i gyfeiriad y pentref, o'r anafiadau a gafodd yn y digwyddiad.
Chafodd neb arall anaf.
Mae'r heddlu'n apelio am wybodaeth gan unrhyw un all helpu'r ymchwiliad i'r achos.