Dau berson 19 oed wedi marw mewn gwrthdrawiad
- Cyhoeddwyd
Mae dyn a menyw 19 oed wedi marw mewn gwrthdrawiad mewn garej yn Abertawe nos Fawrth.
Digwyddodd y gwrthdrawiad am 23:15 yn Northway Garage, Llandeilo Ferwallt (Bishopston) ger Abertawe.
Dywed Heddlu De Cymru bod pedwar person yn teithio mewn car Alfa Romeo Mito lliw coch, ac mai hwnnw oedd yr unig gerbyd yn y digwyddiad.
Bu farw dyn 19 oed o ardal Glandŵr (Landore), a menyw 19 oed o Flaenymaes yn y fan a'r lle.
Dioddefodd merch 17 oed o Benlan anafiadau all beryglu bywyd, a chafodd ei hedfan i'r ysbyty.
Mae bachgen 17 oed o'r Gellifedw (Birchgrove) yn yr ysbyty gydag anafiadau sydd ddim yn peryglu ei fywyd.
Mae'r teuluoedd yn derbyn cefnogaeth gan swyddogion heddlu arbennig.
Roedd y ffordd ar gau am rai oriau wrth i'r heddlu gynnal eu hymchwiliad, ac maent yn apelio am dystion.