Cwpan y Byd am 'wneud gwahaniaeth aruthrol' i'r wlad
- Cyhoeddwyd

Mae Cymru ar eu ffordd i Gwpan y Byd am y tro cyntaf ers 1958
Bydd chwarae yng Nghwpan y Byd yn "gwneud gwahaniaeth aruthrol" i Gymru fel gwlad, yn ôl pennaeth cyfathrebu'r gymdeithas bêl-droed.
Dywedodd Ian Gwyn Hughes y bydd yn "codi'r wlad ym mhob persbectif" gan arwain at lwyfan ryngwladol "i'n hiaith, ein diwylliant a'n hanes".
Llwyddodd Cymru i drechu Wcráin o 1-0 yn Stadiwm Dinas Caerdydd ddydd Sul, gan olygu y bydd y tîm yn mynd i Gwpan y Byd am y tro cyntaf ers 1958.
Mae gorfoledd wedi bod ar draws y wlad, a'r golygon eisoes yn troi at Qatar.
'Taith anhygoel'
Dywedodd Mr Gwyn Hughes ar Dros Frecwast fore Llun fod "y daith wedi bod yn anhygoel".
"Mae 'na lot o bobl - chwaraewyr a staff - sydd wedi bod ar y daith o'r cychwyn rhyw 10 mlynedd yn ôl pan ddaru ni gyd gael ein penodi gan Jonathan Ford [prif weithredwr CBDC ar y pryd].
"Wedyn Gary Speed yn cymryd drosodd a beth ddigwyddodd efo Gary, Chris Coleman a'r nosweithiau o golli yn Serbia 6-1 ac yn y blaen.
"Mewn 10 mlynedd 'dan ni wedi cyrraedd rowndiau terfynol yr Ewros ddwywaith, a rŵan, coroni'r cyfan a chyrraedd Cwpan y Byd."

Mae defnydd cynyddol o'r Gymraeg wedi mynd law yn llaw â'r llwyddiant ar y cae
Ychwanegodd y bydd yr effaith ar broffil Cymru ar draws y byd yn enfawr - Cwpan y Byd ydy'r digwyddiad sy'n cael ei wylio gan y nifer fwyaf o bobl ar draws y byd.
"Fydd o'n gwneud gwahaniaeth aruthrol. Mae'r Ewros yn codi gwlad i ryw lefel, ond mae mwy o bobl yn gwylio Cwpan y Byd nac unrhyw beth," meddai Mr Gwyn Hughes.
"Ti ar y llwyfan rhyngwladol go iawn. 'Dan ni'n wlad fach o dair miliwn, a fydd pawb yn gwybod amdanom ni, achos 'dan ni'n chwarae yn erbyn gwledydd anferth.
"Mae o'n gyfle rŵan. Dwi'n credu weithiau ein bod ni wedi cael ein dal yn y gorffennol, fel pan aethon ni i'r Ewros yn 2016 - nid jest y gymdeithas ond Cymru fel gwlad - be' ydy'r budd sy'n dod o rywbeth fel hyn.
"So mae'n rhaid i bawb baratoi rhwng rŵan a mis Tachwedd i fanteisio ar y cyfle yma a rhoi Cymru ar y map.
"Wrth gwrs, mae'n dod ag arian, mi ddaw â mwy o nawdd ac yn y blaen, ond mae'n rhoi proffil i Gymru ac mi ddylai mwy a mwy o bobl wybod am Gymru, ein hiaith, ein diwylliant a'n hanes.
"Mae'n codi'r wlad ym mhob persbectif dwi'n meddwl."

"Dan ni'n wlad fach o dair miliwn, a fydd pawb yn gwybod amdanom ni," meddai Ian Gwyn Hughes
Ar yr un rhaglen dywedodd y sylwebydd Nic Parry, fu'n arwain sylwebaeth S4C nos Sul, fod cyrraedd pinacl y byd pêl-droed yn "benllanw prosiect ar y cae ac oddi ar y cae".
"Oedd 'na 3.8 biliwn o bobl yn gwylio Cwpan y Byd y tro diwethaf iddi gael ei chynnal - hanner poblogaeth y byd," meddai.
"Wrth y bwrdd yna nawr mae baner Cymru.
"Mae Noel Mooney, y prif weithredwr newydd, wedi cael y profiad fel Gwyddel - mae o wedi tanlinellu dros yr wythnosau diwethaf 'allwch chi ddim coelio sut mae proffil ac ymwybyddiaeth o Iwerddon wedi codi o fod wedi cael bod i Gwpan y Byd'.
"Allwn ni 'mond dychmygu y bydd o, a bydd pobl ddim yn gofyn bellach 'Ble mae Cymru? Ydy Cymru'n rhan o Loegr?'
"Mae Cymru yno fel Cymru, ac mae'r byd yn mynd i weld hynny."

Cefnogwyr Cymru yn canu Yma o Hyd ddydd Sul - anthem answyddogol Cymru erbyn hyn!
Ychwanegodd Nic Parry fod cefnogaeth Cymdeithas Bêl-droed Cymru i'r Gymraeg wedi bod yn anferth, a bod mwy o ddefnydd o'r Gymraeg wedi mynd law yn llaw â'r llwyddiant ar y cae.
"Ar ddiwedd y gêm, oedd yr arwyddon yn fflachio 'Diolch am eich cefnogaeth' - uniaith Gymraeg am gyfnodau," meddai.
"Mae'n rhan o'r prosiect - mae wedi bod yn brosiect oddi ar y cae.
"Mae 'na bethau i gampau eraill ddysgu heb unrhyw amheuaeth.
"Mae cenedlaetholdeb a phêl-droed Cymru bellach yn plethu, ac mae hynny'n glod aruthrol i'r gymdeithas bêl-droed.
"Ond fyddai o ddim yn effeithiol heb i'r chwaraewyr ar y cae wneud eu rhan nhw."
Caniatáu cynnwys X?
Mae’r erthygl yma’n cynnwys elfennau sydd wedi eu darparu gan X. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis X, dolen allanol a pholisi preifatrwydd, dolen allanol cyn derbyn. I weld y cynnwys yma dewiswch ‘derbyn a pharhau’.
Mae defnydd o'r Gymraeg yn sgil y tîm pêl-droed yn ehangu tu hwnt i'r gymdeithas bêl-droed, a thu hwnt i ffiniau'r wlad hyd yn oed, i'r cyfryngau dros y ffin.
Y pennawd ar gefn papur newydd i ar draws y DU ddydd Llun oedd, yn Gymraeg, "Mae Cymru yn mynd i Qatar!"

Dywedodd Dafydd Iwan ei fod "erioed 'di clywed y fath ganu"
Un o'r delweddau sy'n dangos hynny fwy nag unrhyw ddelwedd arall oedd Dafydd Iwan yn canu ar y cae gyda'r chwaraewyr yn ystod y dathliadau yn Stadiwm Dinas Caerdydd.
Mae yntau yn credu fod "rhywbeth arbennig yn digwydd" i'r wlad a'r iaith yn sgil llwyddiant y tîm cenedlaethol.
"Dwi 'rioed 'di clywed y fath ganu. Oedd hi'n arbennig o dda y tro diwethaf, ond ddoe, oedd pob un o'n i'n gallu gweld yn y wal goch 'na yn canu a'i holl galon," meddai ar Dros Frecwast fore Llun.
"Mae o'n lawer mwy na phêl-droed - mae be' mae'r gymdeithas bêl-droed yng Nghymru wedi'i wneud yn wyrth.
"Maen nhw wedi meithrin dros y blynyddoedd diwethaf 'ma y syniad bod y tîm cenedlaethol yn cynrychioli cenedl a'i hanes.
"Maen nhw'n credu hynny, ac maen nhw'n chwarae fel tasen nhw'n credu hynny.
"Roedd cymaint o Gymry di-Gymraeg yn siarad gyda fi ddoe yn dweud mor falch oedden nhw o fod yn gallu canu cân Gymraeg a bod yn rhan o'r bwrlwm."

Dafydd Iwan yn ysgwyd llaw Gareth Bale ar y cae ar ddiwedd y gêm
Ychwanegodd fod cael dychwelyd i'r cae i ganu gyda'r tîm wedi bod yn brofiad "bendigedig".
"Mae 'na rywbeth arbennig yn digwydd yn sgil y pêl-droed 'ma, ac mae'n wych i fod yn rhan o hynny."
Dywedodd Ian Gwyn Hughes fod Dafydd Iwan yn canu ar y cae gyda'r garfan o'i amgylch yn "un o'r delweddau mwyaf anhygoel"
Dywedodd Ian Gwyn Hughes fod Dafydd Iwan yn canu ar y cae gyda'r garfan o'i amgylch yn "un o'r delweddau mwyaf anhygoel" yr ymgyrch a'r noson.
"Oherwydd natur y gân, ti ddim yn gwybod os ydy pawb am ei derbyn hi, ond mae'r cefnogwyr wedi ei bod yn canu hi'n naturiol," meddai.
"So dyma ni'n penderfynu 'nawn ni wahodd Dafydd i ganu'. Oedd y tro cyntaf yn wych, ond oedd neithiwr hyd yn oed yn well.
"Mi oedd pobl yn gwybod beth i'w ddisgwyl a mwy o bobl yn ymwybodol o'r geiriau ac yn y blaen.
"Ar y diwedd, pan wnaed y penderfyniad i ddod â Dafydd 'nôl lawr - dwi'n meddwl oedd Dafydd yn meddwl ein bod ni'n tynnu ei goes o!
"Ar y cae yn canu gyda'r tîm, oedd o'n un o'r delweddau mwyaf anhygoel, a fyset ti byth wedi dychmygu gweld hynny ar gae pêl-droed.
"Mi oedd o'n anhygoel - un o'r eiliadau emosiynol mawr 'na."
Straeon perthnasol
- Cyhoeddwyd6 Mehefin 2022
- Cyhoeddwyd5 Mehefin 2022
- Cyhoeddwyd5 Mehefin 2022