Gareth Bale: Capten Cymru yn symud i Los Angeles FC

Gareth BaleGetty Images

Bydd Gareth Bale a Chymru yn wynebu'r Unol Daleithiau yn Qatar ym mis Tachwedd

Mae Gareth Bale wedi cadarnhau ei fod wedi symud i Los Angeles FC gan roi diwedd ar wythnosau o ddyfalu am ei ddyfodol.

Roedd capten a phrif sgoriwr Cymru, 32, yn rhydd i arwyddo i glwb newydd ar ôl gadael Real Madrid wedi naw mlynedd yn Sbaen.

Bu sibrydion yr wythnos ddiwethaf ei fod yn agos i arwyddo i Gaerdydd, a bu sïon hefyd y gallai ddychwelyd i'w gyn-glwb Tottenham Hotspur.

Ond mae Los Angeles FC a Bale bellach wedi cadarnhau ei fod wedi arwyddo cytundeb 12 mis i chwarae yn yr MLS (Major League Soccer).

Yn gynharach yn y mis, arweiniodd ei wlad i Gwpan y Byd am y tro cyntaf ers 1958 ar ôl i Gymru drechu Wcráin 1-0.

Bydd Cymru yn wynebu'r Unol Daleithiau yn Qatar - yn ogystal ag Iran a Lloegr.

Nid yw’r post yma ar X yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar X.
Nid yw'r BBC yn gyfrifol am gynnwys safleoedd allanol
I osgoi neges X gan Gareth Bale

Caniatáu cynnwys X?

Mae’r erthygl yma’n cynnwys elfennau sydd wedi eu darparu gan X. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis X a pholisi preifatrwydd cyn derbyn. I weld y cynnwys yma dewiswch ‘derbyn a pharhau’.

Nid yw'r BBC yn gyfrifol am gynnwys safleoedd allanol

Daeth cadarnhad yr wythnos ddiwethaf fod asiant Bale wedi cynnal trafodaethau gyda Chaerdydd.

Mae'r Adar Gleision yn rhannu cyfleusterau ymarfer gyda Chymdeithas Bêl-droed Cymru, a fyddai wedi caniatáu i Bale barhau i weithio'n agos gyda staff meddygol a ffitrwydd Cymru tra ar ddyletswydd clwb.

Ond yn lle hynny mae'n debyg o symud i'r Unol Daleithiau, lle mae'r tymor yn rhedeg o fis Chwefror i fis Hydref.

Mae LAFC, sy'n cael ei reoli gan gyn-chwaraewr rhyngwladol UDA Steve Cherundolo, ar hyn o bryd ar frig adran orllewinol yr MLS ac mae ganddyn nhw 19 o gemau tymor arferol i'w chwarae.

Mae gemau ail gyfle diwedd y tymor yn dilyn, gyda rownd derfynol Cwpan MLS yn gorffen y tymor ar 5 Tachwedd.

Byddai hynny 16 diwrnod cyn i ymgyrch Cymru yng Nghwpan y Byd ddechrau gyda gêm yn erbyn yr Unol Daleithiau.

Y siwrne hyd yn hyn

Dechreuodd Bale chwarae i glwb Cardiff Civil Service cyn arwyddo i Southampton yn naw oed.

Ychydig dros flwyddyn ar ôl gwneud ei ymddangosiad gyntaf i'r clwb yn Ebrill 2006 fe symudodd i Tottenham Hotspur am £7m.

Cafodd ei enwi yn Chwaraewr y Flwyddyn y PFA yn 2011 ac yn 2013.

Gareth BaleTottenham Hotspur FC

Treuliodd Bale dymor 2020/21 ar fenthyg gyda Tottenham Hotspur

Wedi iddo sgorio 32 gôl yn ei dymor olaf gyda Spurs, symudodd i Real Madrid am ffi o £85.3m ym Medi 2013 - record byd ar y pryd.

Yn ystod ei yrfa ym mhrifddinas Sbaen fe helpodd y clwb i ennill Cynghrair y Pencampwyr bum gwaith - yn 2014, 2016, 2017, 2018 a 2022.

Ond doedd ei gyfnod yno ddim yn fêl i gyd.

Fe dreuliodd gyfnod ar fenthyg gyda Tottenham Hotspur yn ystod 2020/21 a bu'n agos i symud i China cyn hynny wrth i'w gyfleoedd yn y tîm cyntaf bylu.

Pynciau cysylltiedig

Straeon perthnasol