Cynhyrchu siocled yn chwerwfelys wrth i gostau barhau i godi

Mae creu cynnyrch fforddiadwy yn "anodd iawn" medd cynhyrchydd siocled o Gymru, oherwydd y cynnydd diweddar mewn costau.

Yn ôl cwmni siocled o Hwlffordd yn Sir Benfro, chwerwfelys yw creu siocled ar hyn o bryd oherwydd y costau cynyddol sy'n eu hwynebu.

Dywedodd Karen Owen, cyd-gyfarwyddwr Wickedly Welsh Chocolate Company, bod y flwyddyn ddiwethaf wedi bod yn "frawychus".

Gyda'u bariau siocled moethus yn arfer costio £3.99, mae'r cwmni bellach wedi codi'r pris i £4.25, cynnydd o ryw 5%.

'Trydan, cyflogau, cynhwysion, popeth'

Yn ôl Ms Owen, sy'n rhedeg ei busnes ers wyth mlynedd, doedd y penderfyniad i godi'r pris ddim yn un hawdd.

"Y trydan, cyflogau, cynhwysion, popeth fel 'na, maen nhw i gyd wedi cynyddu ac mae wedi bod yn anodd iawn", meddai.

"Dy'n ni wedi bod yma am wyth mlynedd a dy'n ni ddim wedi codi'r prisiau o gwbl ond gyda'r holl godiadau gyda phopeth, doedd dim dewis gyda ni ond i wneud hynny.

"Roedd yn rhaid i ni godi'r prisiau ychydig bach."

Mae Karen Owen wedi rhedeg Wickedly Welsh Chocolate Company ers wyth mlynedd

"Mae pethau i ni wedi codi 20-30% ac ry'n ni'n gweld hi'n anodd iawn i gadw'r prisiau lawr i'n cwsmeriaid ni.

"Dy'n ni wedi gwneud pethau o fewn y ffatri i gael efficiencies i helpu'r prisiau i'r cwsmeriaid.

"Mae'r prisiau wedi codi i ni ond dy'n ni ddim ar hyn o bryd yn pasio'r prisiau yna i'n cwsmeriaid ni."

• Costau byw: 'Lle mae'n mynd i stopio?'

• Galw ar fusnesau i ysgwyddo mwy o faich costau byw

Fis Mawrth eleni, fe gyhoeddodd perchnogion cwmni siocled Cadbury eu bod yn lleihau maint un o'u bariau o 200g i 180g, gostyngiad o 10%, ond bod pris y siocled yn aros yr un peth.

Mewn datganiad, fe ddywedon nhw wrth BBC Cymru eu bod wedi gorfod gwneud newidiadau oherwydd bod y cynnyrch yn costio llawer fwy i'w gynhyrchu erbyn hyn.

Mae'r cynnydd mewn costau yn taro sawl cwmni, gan gynnwys Wickedly Welsh Chocolate

Yn ôl Kevin White, newyddiadurwr gyda'r cylchgrawn bwyd The Grocer, nid cynhyrchwyr siocled yn unig sy'n cael eu heffeithio gan y cynnydd mewn costau.

"Dwi'n meddwl bod o'n reit gyffredin dros y diwydiant bwyd i gyd," meddai.

"Os 'dach chi angen rhyw fath o ingredient, fel arfer, mae'r gost yn mynd i fyny.

"Yn enwedig, os ydy'r rheiny yn cael eu mewnforio, er enghraifft siocled, mae'n rhaid i chi gael coco o rywle. Mae'r costau wedi tyfu lot a dim just costau tyfu ond costau mewnforio hefyd."

Fydd cwmnïau'n goroesi?

Er bod Mr White yn cydnabod bod llai o arian gan gwmnïau bach i ddelio â'r sefyllfa, mae'n dweud bod y cwmnïau mawr yn ei gweld hi'r un mor anodd, gyda dyfodol nifer yn y fantol.

"Os 'di pethau ddim yn newid yn y flwyddyn nesaf, a mae lot o rybuddion bod hyn yn mynd i ddigwydd, bydd cwmnïau yn mynd allan o fusnes", meddai.

"Mae'n siŵr eu bod nhw [cynhyrchwyr siocled] yn colli lot o gwsg ynglŷn â sut maen nhw'n mynd i dorri costau a pharhau i gynhyrchu.

"Mae'n bryderus iawn i lot o gynhyrchwyr ar y funud oherwydd y sefyllfa yma."

Yn ogystal â'r cynhwysion, mae'r cynnydd ym mhris trydan yn taro elw cwmnïau hefyd

Er gwaethaf y blas cas sy'n gysylltiedig â'r gost o gynhyrchu siocled, mae'r cwmni o Hwlffordd yn benderfynol o barhau i greu siocled moethus am bris fforddiadwy, a'n ffyddiog bydd cefnogaeth eu cwsmeriaid yn parhau, beth bynnag bo'r pris.

"Mae'n cwsmeriaid ni yn ein hadnabod am wneud siocled moethus a hynny sy'n bwysig i ni nawr ac yn y dyfodol.

"Yn fy marn i, mae pobl eisiau treats, maen nhw'n hoffi siocled, felly dwi'n gobeithio bydd pobl yn dal i brynu siocled."