Wrecsam i wahodd Eisteddfod Genedlaethol 2025
- Cyhoeddwyd
![Yr Archdderwydd, Myrddin ap Dafydd, yn arwain y seremoni Urddo am y tro cyntaf yn 2019](https://ichef.bbci.co.uk/ace/standard/976/cpsprodpb/23E5/production/_108198190_c5ba3811-240b-4e90-a516-8425c4afab43.jpg)
Bwriad Cyngor Wrecsam yw croesau'r brifwyl i'r sir am y tro cyntaf ers 2011
Mae cynghorwyr Wrecsam yn bwriadu gwahodd Eisteddfod Genedlaethol 2025 i'r sir.
Mewn cyfarfod ddydd Mawrth fe gytunwyd yn unfrydol i wahodd y brifwyl, wrth i Wrecsam hefyd baratoi cais newydd i fod yn Ddinas Diwylliant y DU.
Collodd Wrecsam allan yn y ras ar gyfer 2025 wedi i Lywodraeth y DU benderfynu dynodi Bradford gyda'r wobr.
Ond mae'r cyngor yn gobeithio bydd yr Eisteddfod yn un o sawl digwyddiad yn Wrecsam wrth baratoi cais o'r newydd ar gyfer Dinas Diwylliant 2029.
'Falch o fod yn rhan o'r trafodaethau'
Dydd Mawrth fe benderfynodd Bwrdd Gweithredol Cyngor Wrecsam ddarparu cyllid a staff er mwyn cefnogi cynnal yr Eisteddfod Genedlaethol - digwyddiad fyddai'n debygol o ddenu degau o filoedd o bobl i'r ardal.
Gyda phrifwyl eleni yn cael ei chynnal yn Nhregaron, bydd yn teithio i Lŷn ac Eifionydd yn 2023 ac yna Rhondda Cynon Tâf y flwyddyn wedyn.
![Eisteddfod Genedlaethol 2018](https://ichef.bbci.co.uk/ace/standard/976/cpsprodpb/F04E/production/_125881516_d2655521-8740-4776-9fd1-c5c63ebc9925.jpg)
Denodd Eisteddfod Genedlaethol 2018 tua 500,000 o bobl i Fae Caerdydd
Dywedodd llefarydd ar ran yr Eisteddfod Genedlaethol: "Mae'r Eisteddfod Genedlaethol wedi bod yn trafod dychwelyd i ardal Wrecsam gyda'r cyngor am beth amser wrth gynllunio taith y Brifwyl dros y blynyddoedd nesaf.
"Roedden ni'n gefnogwyr brwd o gais Wrecsam i fod yn Ddinas Diwylliant y DU yn 2025, ac rydyn ni'n cefnogi cais y ddinas ar gyfer 2029.
"Mae'n gyfnod cyffrous i Wrecsam ac rydyn ni'n falch iawn o fod yn rhan o'r trafodaethau, ac rydyn ni'n croesawu'r ffaith bod y ddinas yn gweld bod ein hiaith yn rhan greiddiol o'r hyn sydd gan yr ardal i'w chynnig a'i hyrwyddo."
'Tua £6m i £8m yn dod i'r economi leol'
Yn ôl Cyngor Wrecsam byddai'r Eisteddfod Genedlaethol yn un o saith digwyddiad o bwys i'w cynnal yn lleol, gyda'r bwriad o atgyfnerthu'r cais ar gyfer statws Dinas Diwylliant 2029.
![Wrecsam o'r awyr](https://ichef.bbci.co.uk/ace/standard/976/cpsprodpb/E1B6/production/_91028775_gettyimages-87222421.jpg)
Mae Cyngor Wrecsam eisiau denu sawl digwyddiad i'r ardal wrth baratoi cais o'r newydd am statws Dinas Diwylliant ar gyfer 2029
Y disgwyl yw bydd Bradford yn elwa o tua £300m mewn cyllid ychwanegol fel rhan o'r statws.
Dywedodd deilydd portffolio celfyddydau Cyngor Wrecsam, Y Cynghorydd Hugh Jones: "Dim ond newydd gael adborth gan y beirniaid ydyn ni ar y cais diwylliant.
"Roedd pobl Wrecsam yn ei groesawu felly'r cwestiwn i ni yw pam na fydden ni'n mynd am Ddinas Diwylliant 2029 pan fyddwn ni wedi cael adborth mor wych a pham na fydden ni'n mynd am yr Eisteddfod yn 2025?
"Os edrychwch chi ar y sefyllfa ariannol ynghylch yr Eisteddfod, mae yna gost i'r cyngor o tua £300,000.
"Ond yna mae 'na amcangyfrif o thua £6m i £8m yn dod i'r economi leol yn yr wythnos honno."
Ychwanegodd: "Mae'r Eisteddfod yn cael effaith gadarnhaol ar fusnesau ac ar y gymuned.
"Mae'n cyd-fynd yn dda â chais Dinas Diwylliant, lle mae'r gymuned yn ganolog i hynny."
Pynciau cysylltiedig
Straeon perthnasol
- Cyhoeddwyd1 Mehefin 2022
- Cyhoeddwyd30 Mai 2022