Dyn yn cyfaddef achosi marwolaeth Abby Hill drwy yfed a gyrru

Dywedodd teulu Abby Hill adeg ei marwolaeth y llynedd ei bod yn 'megis dechrau gwneud ei marc yn y byd'

Mae dyn 26 oed wedi cyfaddef achosi marwolaeth dynes ifanc ger Llangollen y llynedd trwy yrru'n ddiofal dan ddylanwad alcohol.

Bu farw Abby Hill, oedd yn 19 oed ac o Acrefair yn Sir Wrecsam, yn dilyn gwrthdrawiad yn ardal Berwyn fis Gorffennaf 2021.

Clywodd Llys y Goron Yr Wyddgrug fod Marcus Pasley, o Lantysilio ger Llangollen, â 93 microgram o alcohol yn ei waed, o'i gymharu â'r lefel gyfreithlon ar gyfer gyrru sef 80 microgram.

Mae'r Barnwr Rhys Rowlands wedi ei rybuddio y bydd yn cael dedfryd o garchar ac mai'r unig beth sydd i'w benderfynu yw hyd y gosb.

Roedd Ms Hill yn teithio mewn Renault Clio pan ddigwyddodd y gwrthdrawiad ger Gwesty'r Chainbridge, ble roedd hi'n gweithio fel gweinyddes.

Cafodd ei chludo i ysbyty yn Stoke ble bu farw.

Cafodd Pasley ei ryddhau ar fechnïaeth tan 29 Gorffennaf er mwyn i adroddiadau gael eu paratoi cyn y gwrandawiad dedfrydu.

Mae'r llys hefyd wedi ei wahardd rhag gyrru yn y cyfamser.