Agor cwest i farwolaeth bachgen 15 oed mewn chwarel

Fe wnaeth parafeddygon gadarnhau bod Myron Davies wedi marw yn y chwarel ar ôl syrthio yno

Mae cwest wedi ei agor a'i ohirio yn achos bachgen 15 oed a fu farw ar ôl syrthio mewn chwarel yn Nhorfaen.

Fe syrthiodd Myron John Davies o Bont-y-pŵl yn hen chwarel Abersychan ar gyrion y dref ddydd Mercher 6 Gorffennaf.

Wrth agor y cwest yng Nghasnewydd, dywedodd Uwch Grwner Gwent, Caroline Saunders, bod yr heddlu wedi derbyn galwad am 18:36 yn rhoi gwybod bod dau berson wedi syrthio mewn chwarel.

Dywedodd bod parafeddygon wedi cadarnhau bod Myron Davies wedi marw yn y fan a'r lle.

• Apêl mam i ddatrys 'dirgelwch' marwolaeth mewn chwarel

Yn ôl casgliadau cychwynnol archwiliad post-mortem bu farw o anafiadau niferus i'r pen a'r corff.

Ychwanegodd Ms Saunders bod ymchwiliad yr heddlu'n parhau.

Cafodd y cwest ei ohirio tan 27 Ebrill 2023.

Mae'r ail berson a syrthiodd yn y chwarel, merch 14 oed o ardal Blaenafon, yn cael triniaeth am anafiadau difrifol yn Ysbyty Athrofaol Cymru, Caerdydd ar ôl cael ei chludo yno mewn ambiwlans awyr.