Teyrnged i ddyn ifanc fu farw mewn gwrthdrawiad
- Cyhoeddwyd
Roedd Thomas Canton yn fab, brawd a ŵyr serchus, medd ei deulu
Mae teulu dyn 22 oed o Sir Benfro fu farw mewn gwrthdrawiad brynhawn Gwener wedi rhoi teyrnged iddo.
Roedd Thomas Canton, o bentref Nolton Haven ym Mae Sain Ffraid, yn gyrru ei VW Golf du ar yr A487 rhwng Solfach a Niwgwl pan ddigwyddodd y gwrthdrawiad tua 16:20.
Bu'n rhaid cau'r ffordd am rai oriau wedi'r gwrthdrawiad cyn ailagor tua 23:10 nos Wener.
Mae Heddlu Dyfed-Powys yn apelio am dystion a lluniau dash cam wrth i'w hymchwiliad barhau.
Dywedodd teulu Mr Canton, roedden nhw'n ei alw'n Tom, ei fod yn fab, brawd a ŵyr serchus" oedd yn "anturus, yn caru sgrialfyrddio ac â gwir awch am fywyd".
Ychwanegodd datganiad y teulu ei fod "yn ddyn ifanc caredig, meddylgar, cwrtais, hynod ddeallus a phenderfynol oedd yn sicrhau ei fod yn eich holi am eich diwrnod.
"Roedd wastad ag ateb i bopeth ac roedd yn chwim iawn ei feddwl, ac yn weithgar iawn.
"Bydd Tom yn cael ei golli'n arw ganddom ni fel teulu, gymuned a'i gyfeillion."