Neyland: Saith wedi'u hanafu mewn gwrthdrawiad dau gar
- Cyhoeddwyd
Fe ddigwyddodd y gwrthdrawiad ar yr A477 ar gyrion Neyland brynhawn Sadwrn
Mae saith o bobl wedi cael eu hanafu - dau ohonynt yn ddifrifol - yn dilyn gwrthdrawiad rhwng dau gar yn Sir Benfro ddydd Sadwrn.
Dywedodd Heddlu Dyfed-Powys eu bod wedi cael eu galw i'r gwrthdrawiad rhwng Ford Focus gwyn a Nissan Qashqai coch ar yr A477 ger Neyland am 15:00.
Cafodd un person ei gludo i'r ysbyty mewn ambiwlans awyr, tra bod chwech arall wedi'u cymryd yno mewn ambiwlansys arferol.
Dywedodd y llu fod dau berson yn parhau yn yr ysbyty gyda'r hyn maen nhw'n ei ddisgrifio fel "anafiadau difrifol".
Bu'r ffordd ynghau am bron i bum awr cyn ailagor am 19:45 nos Sadwrn.
Mae'r heddlu'n apelio ar unrhyw un sydd â gwybodaeth am y digwyddiad i gysylltu â nhw.