Sir Benfro: Rhybudd bod carthion wedi llifo i'r traeth

Arwydd o rybudd ar draeth Pont-yr-ŵr

Mae pobl wedi cael eu rhybuddio am garthion posib yn y dŵr mewn ardal boblogaidd yn Sir Benfro.

Mae'r rhybudd yn berthnasol i ardal Pont-yr-ŵr, rhwng Llanusyllt (Saundersfoot) ac Amroth, sy'n boblogaidd ymysg twristiaid. Mae'r traeth yn parhau ar agor.

Dywedodd Cyngor Sir Penfro bod effaith posib ar ansawdd y dŵr, a bod y risg o gael eich heintio yn uwch.

Yn ôl llefarydd ar ran Cyfoeth Naturiol Cymru, maen nhw'n ymchwilio i'r sefyllfa ac mae hi'n cael ei datrys.

Daw hyn wedi i ymgyrchwyr ddweud fod gan gwmnïau dŵr a Llywodraeth Cymru gyfrifoldeb i ddiogelu iechyd cyhoeddus rhag carthion yn gorlifo.

Roedd pobl yn y dŵr er gwaetha'r rhybudd

Dywedodd Llywodraeth Cymru ei bod wedi ymrwymo i wario £40m ar wella'r sefyllfa dros y tair mlynedd nesaf.

Mae Dŵr Cymru'n ymgynghori'n gyson ar gynllun 25 mlynedd i atal carthion rhag gorlifo - cynllun lle caiff carthion eu rhyddhau i'r amgylchedd er mwyn eu rhwystro rhag llifo'n ôl mewn i dai pobl.

'Pryderus iawn'

Mae Jonathan Paul Lewis yn poeni am effaith y sefyllfa ar ei blant

Un oedd yn poeni am y sefyllfa oedd Jonathan Paul Lewis, sydd â charafan yn Llanusyllt.

"Mae gen i ddau o blant, dwi'n treulio llawer o amser ar y traeth ac yn y dŵr... yn enwedig yn yr ardal hon, a dwi'n bryderus iawn am fy mhlant yn mynd yn sâl.

"Rydyn ni yma am ychydig o ddyddiau a 'dan ni'n treulio'r mwyafrif o'n hamser ni yn y dŵr... os yw'r plant yn cwympo'n sâl dros y dyddiau nesa' 'ma, bydda i ddim wir yn gwybod ble i edrych."

Fe fydd Janet a Peter James yn mynd i'r traeth er gwaetha'r rhybudd

Dywedodd Janet a Peter James o Lanusyllt eu bod am barhau i fynd i'r traeth er gwaetha'r rhybudd, ond eu bod am fod yn fwy gofalus.

"Rydyn ni wedi cerdded ar hyd y traeth. Doedden ni ddim yn bwriadu nofio heddiw, a siŵr o fod 'nawn ni ddim nofio er mwyn bod yn ofalus.

"'Swn i'n hoffi meddwl petai'r broblem yn ddifrifol byddai'r traeth ar gau."

'Peri pryder'

Dylai pobl gymryd camau bach i ddiogelu eu hunain, medd Edwin Morris

Dywed Edwin Morris o Frynaman, sy'n ymweld â'r traeth yn aml, iddo erioed weld arwydd o'r fath o'r blaen.

"Yn amlwg mae'n peri pryder, ond mae bywyd yn risg - felly golchwch eich dwylo a pheidiwch ag yfed gormod o ddŵr môr.

"Dyw e ddim wedi'n hatal ni rhag gwneud unrhyw beth."

Roedd y traeth i weld yr un peth â'r arfer, medd Jess Parker a Seb Smith

Fe aeth Jess Parker a Seb Smith o Benrhiwceiber i nofio gyda'u ci.

"Dim arogl gwael, dim byd - roedd y dŵr yr un peth â ma' fe drwy'r amser."

Yn ôl Margaret Caroline Rees, sy'n gwerthu hufen ia ar y traeth, roedd yna bobl yn y dŵr fore Iau a dydd Mercher.

Ym marn Margaret Caroline Rees mae'r sefyllfa yn un bryderus

"Roedd hi bach yn dawel ddoe, ond galla i ddim gweld sut fyddai unrhyw un wedi bod yn ymwybodol o'r peth.

"Mae'r bobl leol i weld yn pryderu - daeth un ddynes lan ata i bore 'ma i ofyn amdano, ac roedd hi i weld yn poeni."

Dywedodd llefarydd ar ran Cyfoeth Naturiol Cymru eu bod yn ymchwilio i'r digwyddiad a bod y sefyllfa yn cael ei datrys.

"Rydyn ni'n cyflwyno trwydded i ganiatáu carthion i orlifo yn ystod glaw trwm - yn enwedig ble gallai cyfaint y dŵr effeithio ar dai ac eiddo," meddai.