Teyrnged i 'fab, tad, brawd ac ewythr cariadus'

Bu farw Ian Christopher Seaborne mewn gwrthdrawiad rhwng dau gar ym Mhort Talbot ddydd Mawrth

Mae teulu dyn fu farw mewn gwrthdrawiad ym Mhort Talbot ddydd Mawrth wedi rhoi teyrnged i "fab, tad, brawd ac ewythr cariadus".

Bu farw Ian Christopher Seaborne, 62 oed o Dreforys, Abertawe, mewn gwrthdrawiad rhwng dau gar ar yr A4241, Ffordd yr Harbwr.

Roedd yn gyrru Ford Fiesta, a bu farw yn y fan a'r lle, tra bod gyrrwr Skoda Octavia wedi'i gludo i'r ysbyty â mân anafiadau.

"Roedd yn fab, tad, brawd ac ewythr cariadus, ac roedd ei wên a'i goegni wastad yn llenwi'r ystafell â llawenydd a chwerthin," meddai ei deulu mewn datganiad.

"Bydd yn cael ei golli'n fawr a'i garu am byth."

Mae Heddlu De Cymru yn parhau i apelio ar unrhyw dystion i'r digwyddiad i gysylltu â'r llu.