Achub dringwr oddi ar Garnedd Llywelyn

Bu'n rhaid i'r dringwr gael ei ostwng ymhellach cyn i'r hofrennydd allu ei gludo oddi yno

Mae dringwr wedi cael ei achub oddi ar Graig Yr Ysfa ar Garnedd Llywelyn ar ôl syrthio a chael anafiadau difrifol i'w gefn.

Cafodd Tîm Achub Ogwen eu galw am 12:00 ddydd Mawrth i gynorthwyo'r dyn, oedd wedi disgyn 20m tra'n dringo ar ei ben ei hun.

Fe gafodd hofrennydd o Gaernarfon ei alw, ond oherwydd natur y tirwedd roedd yn rhaid gostwng y dringwr 25m ymhellach cyn gallu ei symud oddi yno.

Fe gafodd ei gludo i Ysbyty Gwynedd ym Mangor, ar ôl ymdrech a barodd dros bum awr.