Llŷr Alun: Lle mae o rŵan?
- Cyhoeddwyd
Yr artist a'r cerddor Llŷr Alun
Rhedeg hanner marathon, rhedeg label cerddoriaeth, codi pres i elusennau, cynnal gigs... Rhai o anturiaethau diweddaraf Llŷr Alun.
Holltwyd barn ymhlith cynulleidfa cyfres Am Dro ar S4C flwyddyn a hanner yn ôl pan wnaeth yr artist a'r cerddor Llŷr Alun o Sling ger Bethesda fynd adref gyda £1,000.
Roedd pobl wedi eu cythruddo ar ôl iddo gipio'r wobr gan ddefnyddio ei ddull o roi marciau isel i'w gyd-gystadleuwyr er mwyn ennill. Ar y llaw arall roedd eraill yn clodfori 'dafad ddu' Cymru am ei fuddugoliaeth ysgubol.
Ond be mae Llŷr Alun yn gwneud y dyddiau yma, gofynnwch chi? Sut mae'n edrych yn ôl ar Am Dro? A be ydi ei neges i'r byd?
Llŷr yn pwyntio at "dŷ chwaer Dylan Thomas"
'Hilarious'
Mae Llŷr bellach yn byw yng Nghaerdydd lle mae'n gweithio mewn dwy swydd - mewn cegin bwyty ac yn mynd a threlar coffi o gwmpas parciau'r ddinas.
Sut mae'n edrych yn ôl ar Am Dro tybed?
"Wel, 'swn i'n licio os fysa pobl Cymru mor disappointed fod ganddon ni food banks dros y wlad i gyd ag oeddan nhw yn cwyno am raglen ar teli," meddai.
"Rhywun yn curo £1,000 pan mae 'na track and trace system werth biliynau 'di mynd i'r cwmnïau ma a dim trace o lle ma'r pres 'di mynd. Ma hynna'n shocking.
Llŷr Alun ar Am Dro
"Oni'm yn meindio'r ymateb, oni'n gweld o yn hilarious, jest odd Mam 'di ypsetio 'chydig bach ond oni'm yn bothered fy hun.
"Os 'swn i'n neud o eto 'swn i'n rhoi un allan o ddeg i bob un ohonyn nhw a hefyd 'swn i ddim yn cwcio Sunday dinner efo Yorkshire puddings gluten free ac anghofio nhw yn y popty. 'Swn i 'di prynu'r bwyd o'r pub."
'Peidiwch â trio rhy galad'
Yn ei amser sbâr mae Llŷr yn yn cynnal gigs, yn rhedeg label cerddoriaeth a, pan mae'n gallu, yn codi arian i elusennau.
Yn ddiweddar mi redodd hanner marathon Caerdydd gan godi £620 - dros dwbwl ei darged o £250 i elusen Gig Buddies, a hynny drwy ddulliau paratoi anarferol i ddweud y lleiaf.
"'Swn i yn recomendio half marathon i unrhyw un achos one week training plan fi oedd… day one - cael yn absolutely chwil gachu yn Venice, day two - same, day three - fflïo yn ôl o Venice wedyn golchi llestri am 10 awr, day four - day off, wedyn y fifth day nes i weithio 10 hour shifft a chael KFC, wedyn day six nes i weithio 10 hour shifft a byta McDonalds a KFC, a chael pump can o Corona.
"Wedyn nes i wneud y marathon diwrnod wedyn… so, peidiwch â thrio rhy galad!"
Y diweddaraf o fyd Llŷr Alun
"O'n i 'di gwneud 20,000 steps y diwrnod cynt jysd yn gwaith yn front of house ac wedyn ar ôl gwneud y marathon oedd steps fi yn tua 35,000 so doedd o ddim hynna faint yn fwy."
Gorffennodd yr hanner marathon mewn amser addawol iawn o ddwy awr ac wyth munud ac mae'n falch o godi arian i elusen sy'n agos at ei galon.
Meddai Llŷr: "Mae'r achos yn bwysig i fi achos mae Mam a Dad 'di gweithio yn y mental health sector.
"Mae o'n dangos dylia pawb gael y cyfla i wneud be maen nhw isio gwneud ac mae Gig Buddies yn providio rhywun efo anabledd efo partner fel bo' nhw yn gallu mynd i gigs a ddim methu allan."
Ffordd arall mae Llŷr yn codi arian i elusennau ydi trwy werthu crysau-t a phosteri: "Ond does 'na neb isio Bob Geldof Cymraeg felly dw'i ddim yn licio bragio am y peth," meddai.
Poster Llŷr sy'n chwarae ar eiriau slogan 'Nid oes bradwr yn tŷ hwn' gan streicwyr chwarelwyr Penrhyn yn ardal magwraeth yr artist. Mae'r holl arian yn mynd at fanciau bwyd
Recordiau Noddfa
Fel cerddor mae mynd i gigs a chreu cerddoriaeth yn rhan fawr o fywyd yr artist. Sefydlodd label Recordiau Noddfa sy'n cynnwys bandiau fel 3 Hŵr Doeth, Pasta Hull a'i fand yntau, Crinc, sydd wrthi'n recordio eu halbwm cyntaf yn y Buarth - sef stiwdio DIY y label mewn shipping container yng Nghaerdydd.
"'Dan ni hefyd jyst iawn a seinio MC Bunch of Nicnacs ond dydi o ddim cweit wedi seinio contract eto achos mae 'na dispute am faint mae o'n cael ei dalu am releasio'r albwm," meddai Llŷr.
"Dwi'n edrych ymlaen at ryddhau mwy o betha, a fydd y website fyny cyn bo hir."
Logo Recordiau Noddfa. Dechreuodd y label yn hen adeilad Recordiau Cob ym Mangor
Mae Llŷr wedi bod yn gyfrifol am gynnal llu o ddigwyddiadau cerddorol dros y blynyddoedd ac mae'n falch o allu cynnal mwy eto wedi cyfnod distaw Covid-19, gan ddechrau yng Ngŵyl y Llais, 26-30 Hydref 2022.
Ar nos Sul yr ŵyl yng Nghanolfan y Mileniwm Caerdydd - sydd â pherfformiadau gan John Cale, Cate Le Bon a Black Midi - mae Noddfa yn cael llwyfan gyfan fydd yn rhoi platfform i Pasta Hull, 3 Hwr Doeth, Melin Melyn, HMS Morris a Crinc.
Hefyd mae ganddo noson Hosan Lawen yn Neuadd Ogwen ar 17 Rhagfyr ble bydd 3 Hŵr Doeth, Melin Melyn, Papur Wal, KIM HON, Pys Melyn a Crinc yn perfformio.
3 Hŵr Doeth
'Llonydd'
Mae Llŷr dal yn ddryslyd hyd heddiw am ymateb pobl yn sgil Am Dro, meddai:
"Mae priorities pobl bach dros y lle os ydyn nhw'n cwyno am rywun yn curo rhaglen teledu lle'r point o wneud y rhaglen ydi curo."
Ond mae o wedi symud ymlaen gyda'i fywyd ac mae'n gobeithio gall bawb arall wneud hynny hefyd… Er, dydi o ddim yn swnio yn dasg mor hawdd chwaith.
"Dwi'n byw yng Nghaerdydd rŵan, so dwi'n cal bach o lonydd, ond os dwi'n mynd i Glôb (Bangor) neu 'wbath maen nhw fatha 'O Llŷr ga'i lun?'; 'dw'i fatha 'Na, dwi'm yn foi am selfies'.
"Ond wnaeth 'na rhywun ddod ata fi mewn bar yng Nghaerdydd a deud 'Dwi'n 'nabod ti o rywle… dim ti yw'r (gair anweddus) 'na off Am Dro?' ag o'n i fel 'Ia, that's the one!'"