Enwi Justin Tipuric yn gapten ar gyfer gemau'r hydref

Mae Justin Tipuric, capten y Gweilch, wedi chwarae 85 o weithiau dros ei wlad

Blaenasgellwr Y Gweilch, Justin Tipuric, fydd yn arwain tîm rygbi Cymru yng nghyfres yr hydref yn absenoldeb Dan Biggar.

Bydd Biggar yn methu'r gemau yn erbyn Seland Newydd, Ariannin, Georgia ac Awstralia gydag anaf i'w ben-glin.

Mae bachwr Y Gweilch, Dewi Lake, hefyd wedi'i anafu gan ychwanegu at restr hir o chwaraewyr blaenllaw sydd ddim ar gael i'r hyfforddwr, Wayne Pivac.

"Mae'n anrhydedd, a doeddwn i ddim cweit yn ei disgwyl hi i fod yn onest," meddai Tipuric, 33.

"Dwi ond yn hapus i fod yn ôl yn y garfan, ac mae cael y cyfrifoldeb o arwain criw mor dda o fechgyn ar y cae yn bendant yn un o uchafbwyntiau gyrfa rhywun."

Mae Cymru'n dechrau cyfres yr hydref yn erbyn y Crysau Duon ar 5 Tachwedd.

Rhestr hir o anafiadau

Yn ogystal â Biggar, mae Liam Williams, Wyn Jones, Leon Brown, Seb Davies, Johnny Williams, Josh Navidi a Taine Basham oll yn absennol gydag anafiadau.

A dros y penwythnos cafodd Dewi Lake anaf i'w ysgwydd yn erbyn y Dreigiau gan ychwanegu at bryderon Cymru. Mae cyn-flaenwr Ulster, Bradley Roberts, wedi cymryd ei le yn y garfan.

Bydd Pivac yn croesi ei fysedd gyda ffitrwydd nifer o chwaraewyr eraill sydd â mân anafiadau, gan gynnwys George North (pen-glin), Leigh Halfpenny (llinyn y gar), Josh Adams (llaw), Alex Cuthbert (ysgwydd) a Gareth Anscombe (asennau).

Methodd Justin Tipuric dymor 2021-22 gydag anaf i'w ysgwydd, a gafodd tra'n chwarae i'r Llewod yn erbyn Japan ym Mehefin 2021.

Ond ddechrau'r tymor hwn, dioddefodd anaf i'w asennau cyn dychwelyd i chwarae i'w glwb yn erbyn y Dreigiau ar 23 Hydref.

Cafodd Tipuric ei ddewis i arwain ei wlad am y tro cyntaf yn erbyn Uruguay yng Nghwpan y Byd 2019. Cymerodd drosodd oddi wrth Alun Wyn Jones fel capten y Gweilch yn 2018.

Carfan Cymru ar gyfer gemau'r hydref

Blaenwyr: Rhodri Jones (Dreigiau), Nicky Smith (Gweilch), Gareth Thomas (Gweilch), Ryan Elias (Scarlets), Bradley Roberts (Dreigiau), Ken Owens (Scarlets), Tomas Francis (Gweilch), Dillon Lewis (Rygbi Caerdydd), Sam Wainwright (Saraseniaid), Adam Beard (Gweilch), Ben Carter (Dreigiau), Alun Wyn Jones (Gweilch), Will Rowlands (Dreigiau), Taulupe Faletau (Rygbi Caerdydd), Dan Lydiate (Gweilch), Josh MacLeod (Scarlets), Jac Morgan (Gweilch), Tommy Reffell (Caerlyr) Justin Tipuric (Gweilch, capt), Christ Tshiunza (Caerwysg).

Olwyr: Dane Blacker (Scarlets), Kieran Hardy (Scarlets), Tomos Williams (Rygbi Caerdydd), Gareth Anscombe (Gweilch), Sam Costelow (Scarlets), Rhys Priestland (Rygbi Caerdydd), Joe Hawkins (Gweilch), George North (Gweilch), Nick Tompkins (Saraseniaid), Owen Watkin (Gweilch), Josh Adams (Rygbi Caerdydd), Alex Cuthbert (Gweilch), Rio Dyer (Dreigiau), Leigh Halfpenny (Scarlets), Louis Rees-Zammit (Caerloyw).