Cyhoeddi enw dyn fu farw wrth gerdded yn Eryri

Mae Glyder Fach yn 3,261 troedfedd, neu 993 o fetrau, o uchder

Mae cwest wedi ei agor a'i ohirio yn achos cerddwr a fu farw yn Eryri wythnos yn ôl.

Clywodd wrandawiad yng Nghaernarfon bod Raymond Charles Turvey, peiriannydd wedi ymddeol 72 oed o ardal Milton Keynes, wedi marw wrth gerdded ar Glyder Fach.

Dywedodd y Crwner, Sarah Riley, fod Mr Turvey wedi bod yn aros yn hostel Pen-y-Pass ger Llanberis pan aeth i gerdded ar y Glyderau fore Mercher 16 Tachwedd.

Cysylltodd staff yr hostel â'r gwasanaethau brys pan fethodd â dychwelyd fin nos, ac fe gafodd ei gorff ei ddarganfod y bore canlynol.

Anafiadau niferus

Mewn adroddiad dros dro dywedodd patholegydd fod y pensiynwr wedi marw o ganlyniad i anafiadau niferus, ac mai'r dybiaeth yw ei fod wedi syrthio.

Roedd timau achub mynydd Llanberis, Ogwen a Llu Awyr Y Fali, ynghyd â hofrennydd Gwylwyr y Glannau, wedi bod yn chwilio am Mr Turvey dros ardal eang mewn cymylau isel a glaw trwm.

Cafwyd hyd i'w gorff ar lwybr sgri, ger Y Grib Bigog, ac fe gafodd ei gludo ar stretsier i ganolfan Tîm Achub Mynydd Ogwen.

Cafodd y cwest ei ohirio er mwyn cynnal rhagor o ymchwiliadau.