Cludo cerddwr i'r ysbyty gydag anafiadau difrifol

Mae cerddwr wedi ei gludo i'r ysbyty gydag anafiadau difrifol wedi iddo gael ei daro gan gar yn Noc Penfro.

Cafodd swyddogion heddlu eu galw i Stryd Laws yn gynnar brynhawn Gwener wedi'r gwrthdrawiad rhwng car a'r cerddwr, oedd yn defnyddio ffrâm gerdded.

Yn ôl Heddlu Dyfed-Powys roedd y gwrthdrawiad yn cynnwys car Chrysler Grand Voyager du.

Fel rhan o'r ymchwiliad mae swyddogion yn gofyn i unrhyw un sydd ag unrhyw wybodaeth i gysylltu â nhw.