Cau ysgolion a ffyrdd ar ôl rhew ac eira

Ym Mhendeulwyn, Bro Morgannwg, fe wnaeth sawl cerbyd droi drosodd ar y lonydd rhewllyd, ond nid oes adroddiadau o anafiadau

Mae ffyrdd ynghau a chyngor i bobl ar draws Cymru fod yn ofalus wrth i rew ac eira daro'r wlad.

Mae amryw o rybuddion mewn grym gan y Swyddfa Dywydd, gyda'r cyntaf o'r rheiny - rhybudd melyn am rew ac eira ar gyfer gogledd Cymru - wedi dod i ben am hanner dydd ddydd Mawrth.

Bryd hynny, fe ddaeth rhybudd arall am rew ac eira i rym tan 12:00 ddydd Mercher ar gyfer mwyafrif y wlad - pob sir oni bai am Sir Benfro, Bro Morgannwg, Caerdydd, Castell-nedd Port Talbot a Phen-y-bont.

Ond mae rhybudd arall, hefyd am rew ac eira, yn weithredol ar gyfer y siroedd hynny yn y de a'r de-orllewin o 18:00 nos Fawrth tan hanner dydd ddydd Mercher.

• Oriel: Eira dros rannau o Gymru

Roedd sawl ysgol yn Sir Conwy, Sir Ddinbych a Sir y Fflint ynghau ddydd Mawrth o ganlyniad i'r amodau gaeafol.

Cadarnhaodd Coleg Llandrillo hefyd y bydd eu campws yn Llandrillo-yn-rhos, Sir Conwy, ynghau ddydd Mawrth oherwydd "eira trwm".

Caeau rhewllyd yn ardal Derwen, rhwng Rhuthun a Chorwen yn Sir Ddinbych, fore Mawrth

Roedd y tymheredd oeraf dros nos yng Nghymru ym Mhontsenni, Powys, ble cyrhaeddodd hi -7.7C

Dywedodd Heddlu Gogledd Cymru fore Mawrth eu bod naw o wrthdrawiadau wedi cael eu hadrodd i'r llu dros nos yn sgil "amodau gwael iawn ar y ffyrdd".

Roedd y llu wedi dweud nos Lun fod gwrthdrawiadau ar ffyrdd gwledig ger Rhuthun a'r Bala.

Yr olygfa yng Nghonwy fore Mawrth

Cafodd yr A55 ei rhwystro'n rhannol i gyfeiriad y gorllewin ger cyffordd 35 yn Sir y Fflint oherwydd gwrthdrawiad yn sgil yr eira.

Bu'r A470 hefyd ynghau rhwng Rhaeadr Gwy a Llangurig ym Mhowys oherwydd llifogydd.

Roedd y B5105 ar gau dros nos yng Nghonwy, rhwng Llanfihangel Glyn Myfyr i Glawddnewydd, oherwydd eira.

Roedd traffig yn araf ar yr A55 fore Mawrth oherwydd yr amodau, fel yma yn ardal Ewlo, Sir y Fflint

Cafodd 14 o wrthdrawiadau eu hadrodd i Heddlu De Cymru dros nos, ac wyth i Heddlu Gwent.

Roedd sawl ffordd ar gau nos Lun, gan gynnwys rhan o'r A488 rhwng Bleddfa a Thref-y-clawdd ym Mhowys a'r B4263 at fynydd Caerffili.

Dywedodd Heddlu'r De y bu Ffordd Lecwydd (B4267) hefyd ynghau i'r ddau gyfeiriad ym Mro Morgannwg oherwydd yr amodau gwael.

Daw wrth i sawl ardal yng nghanolbarth, gorllewin a de Cymru barhau i ddelio gydag effeithiau llifogydd yn dilyn glaw trwm.

Eira ar ffordd wledig ym mhentref Treuddyn ger Yr Wyddgrug

Gwiriwch a oes ysgolion ynghau yn eich ardal chi

• Abertawe

• Sir Benfro

• Blaenau Gwent

• Bro Morgannwg

• Caerdydd

• Caerffili

• Casnewydd

• Castell-nedd Port Talbot

• Ceredigion

• Conwy

• Sir Ddinbych

• Sir y Fflint

• Sir Fynwy

• Sir Gaerfyrddin

• Gwynedd

• Merthyr Tudful

• Pen-y-bont ar Ogwr

• Powys

• Rhondda Cynon Taf

• Torfaen

• Wrecsam

• Ynys Môn