Dowlais: Dau wedi'u hanafu'n ddifrifol wedi 'ffrwydrad nwy'
- Cyhoeddwyd
Bu'n rhaid i rai trigolion adael eu cartrefi nos Fercher
Mae pump o bobl yn yr ysbyty, dau wedi'u hanafu'n ddifrifol, yn dilyn adroddiadau o ffrwydrad nwy mewn tŷ ym Merthyr Tudful.
Dywed Heddlu'r De fod dyn 19 oed a menyw 18 oed wedi dioddef llosgiadau yn y digwyddiad yn ardal Dowlais am tua 22:30 nos Fercher.
Y gred yw, meddai'r heddlu, nad yw eu bywydau mewn peryg.
Bu'n rhaid i nifer o bobl adael eu cartrefi oherwydd y difrod.
Mae'r heddlu a'r Gweithgor Iechyd a Diogelwch yn ymchwilio i achos y ffrwydrad.
Dywedodd Gwasanaeth Tân ac Achub De Cymru fod criwiau wedi diffodd y tân yn llwyddiannus erbyn tua 23:46.
Nid yw preswylwyr dau dŷ, gan gynnwys y cartref gafodd ei effeithio, wedi cael dychwelyd eto, meddai'r heddlu.
Mae'r tŷ wedi cael ei gau i ffwrdd gan yr heddlu, gyda swyddogion o'r Uned Ymchwilio Gwyddonol yn bresennol ddydd Iau.
Roedd swyddogion Wales and West Utilities yno hefyd ynghyd â chwmni trydanol SSE a Merthyr Valleys Homes.
"Byddwn yn hoffi diolch i gymuned Dowlais am eu hamynedd, dealltwriaeth a chefnogaeth i'r rhai sydd wedi cael eu heffeithio ac i'n staff yn yr ardal," meddai'r arolygydd Jon Duckham.