Treforys: Cath yn dod i'r fei wythnos wedi ffrwydrad

Cafodd Teddy ei aduno gyda'i berchennog, Claire, ddydd Sul

Mae cath a gafodd ei ddal mewn ffrwydrad wedi ei ganfod yn fyw bron i wythnos ar ôl iddo fynd ar goll.

Bu farw Brian Davies, 68, yn y ffrwydrad nwy a ddifrododd sawl tŷ yn Nhreforys, Abertawe ddydd Llun diwethaf.

Cafodd tri arall eu hanafu, gan gynnwys perchennog y gath goll, Claire Griffiths-Bennett, a'i mab.

Tra gafodd un o gathod y teulu ei achub o'r rwbel yn fuan wedyn, roedd Teddy dal ar goll.

Ond ddydd Sul dywedodd canolfan anifeiliaid yr RSPCA, Llys Nini, fod Teddy yn fyw ac yn ddiogel.

Y gred yw fod Teddy wedi bod yn byw ymysg adfeilion y tŷ

Roedd Teddy wedi ei weld ddydd Mawrth ond roedd diffyg mynediad i'r tŷ yn golygu nad oedd posib ei ddal ar y pryd.

Dywedodd llefarydd ar ran Llys Nini: "Cafodd Claire ei rhyddhau o'r ysbyty ddydd Sul ac aeth yn syth at weddillion y tŷ i weld a fyddai Tedi'n ymateb i'w chwibanu.

"Fodd bynnag, ar ôl cyrraedd, cafodd ei chyfarch â'r newyddion bod Teddy newydd gael ei ddal."

Tra'n ymddangos i fod yn ddi-anaf, bydd Teddy'n cael ei wirio gan filfeddyg.

"Roedd yna ddagrau," ychwanegodd y llefarydd.