Niferoedd sy'n aros am driniaeth wedi gostwng am y pedwerydd mis

Mae'r gwrthbleidiau wedi beirniadu'r oedi hir, gan honni bod arosiadau o dros ddwy flynedd wedi eu "dileu bron" yn Lloegr

Mae'r niferoedd sy'n aros am driniaeth gan y gwasanaeth iechyd yng Nghymru wedi gostwng am y pedwerydd mis yn olynol, yn ôl yr ystadegau diweddaraf.

Ond mae'r ffigyrau ar gyfer mis Ionawr yn dangos bod dros 734,000 o driniaethau yn aros i'w cwblhau - 58.4% yn fwy nag ar ddechrau'r pandemig.

Mae'r ffigyrau hefyd yn dangos ym mis Ionawr y bu 41,000 achos lle mae rhywun wedi aros dros ddwy flynedd am driniaeth, er gwaethaf targed gan Lywodraeth Cymru i ddileu amseroedd aros o'r hyd hwn erbyn mis Mawrth.

Mae'r gwrthbleidiau wedi beirniadu'r oedi hir, gan honni bod arosiadau o fwy na dwy flynedd wedi eu "dileu bron" yn Lloegr.

'Cynnydd yn y rhan fwyaf o feysydd'

Dywedodd y Gweinidog Iechyd Eluned Morgan: "Er gwaethaf y pwysau cyson ar wasanaethau dros y gaeaf, mae'r darlun cyffredinol ar gyfer mis Ionawr a mis Chwefror yn un o gynnydd yn y rhan fwyaf o feysydd.

"Rwyf wedi nodi'n glir i arweinwyr y gwasanaeth iechyd fy mod yn disgwyl i'r gwelliannau hyn barhau, a hynny'n gyflymach wrth inni gyrraedd y misoedd cynhesach."

Ychwanegodd: "Mae'n gysur imi weld gwelliannau pellach mewn gofal brys, gyda'r gyfran uchaf o gleifion yn cael eu brysbennu, eu hasesu, a'u rhyddhau o adrannau argyfwng o fewn pedair awr, a'r nifer lleiaf o drosglwyddiadau ambiwlans hir ers mis Medi 2021."

Ond dywedodd llefarydd iechyd y Ceidwadwyr Cymreig, Russell George: "Mae'r ffaith bod degau o filoedd o bobl yng Nghymru yn aros dros ddwy flynedd am driniaeth yn brawf damniol o anallu'r llywodraeth Lafur i wneud gwahaniaeth gwirioneddol i fywydau cleifion a staff meddygol."

Mae'r ystadegau yn dangos gwelliannau mewn amseroedd aros am ofal brys.

Ym mis Chwefror fe ymatebodd y gwasanaeth ambiwlans i 50.9% o alwadau coch - y rhai lle mae bywyd mewn perygl - o fewn wyth munud.

Mae hyn yn welliant o'i gymharu â ffigwr 48.9% mis Ionawr ac yn sylweddol uwch na'r lefel isaf erioed ym mis Rhagfyr, sef 39.5%.

Ond mae perfformiad yn dal yn llawer is na'r targed, sef 65%.

• Gweinidog iechyd yn goroesi pleidlais o ddiffyg hyder

• Ymddiheuro am bwysau 'aruthrol' ar y gwasanaeth iechyd

• Amseroedd aros gwaethaf erioed i adrannau brys

Mae'r ffigyrau hefyd yn dangos ym mis Chwefror fod 71.6% o gleifion wedi treulio llai na phedair awr mewn adrannau brys, sy'n welliant ar y ffigwr 69.9% ar gyfer Ionawr.

Bu gostyngiad hefyd yn y niferoedd sy'n treulio dros 12 awr yn aros.

Ym mis Chwefror roedd 8,036 o gleifion wedi aros 12 awr neu fwy.

Roedd hyn 961 (10.7%) yn llai nag yn y mis blaenorol, a'r gorau ers mis Gorffennaf 2021.

Ond mae'r targedau'n nodi na ddylai unrhyw un fod yn aros mor hir â hynny.

Mae'r ystadegau diweddaraf yn dangos dirywiad parhaus mewn perfformiad amseroedd aros ar gyfer gofal canser

Fodd bynnag, mae'r ystadegau diweddaraf yn dangos dirywiad parhaus mewn perfformiad amseroedd aros ar gyfer gofal canser.

Ym mis Ionawr, dechreuodd 50.1% (881 allan o 1,760) o achosion eu triniaeth o fewn 62 diwrnod i gael eu hamau o ganser am y tro cyntaf.

Roedd hyn 2.8% yn is na'r mis blaenorol, 3.6 % yn is nag Ionawr 2022, a'r isaf ar gofnod.