Cludo pedwar i'r ysbyty yn dilyn rêf ym Margam

Mae gorchymyn mewn grym i gyfeirio pobl oddi wrth Ystad Ddiwydiannol Cynffig

Mae pedwar o bobl wedi cael eu cludo i'r ysbyty yn dilyn rêf anghyfreithlon ar stad ddiwydiannol ym Mhort Talbot.

Fe dderbyniodd Heddlu'r Dde adroddiadau am 23:40 nos Sadwrn bod yna ddigwyddiad cerddorol didrwydded yn ardal Ystad Ddiwydiannol Cynffig ym Margam.

Yn ôl y llu, roedd adroddiadau cychwynnol yn awgrymu bod dros 1,000 o bobl a 70 o gerbydau yna.

Doedd dim un o'r o'r bobl a gafodd eu cludo i'r ysbyty wedi eu hanafu'n ddifrifol, yn ôl y gwasanaethau brys.

Fe gadarnhaodd yr heddlu yn hwyr prynhawn Sul bod "nifer fach o gerbydau a phobl" yn dal yn safle'r digwyddiad, ynghyd â'r gwasanaethau brys a phartneriaid lleol sydd wedi cefnogi unigolion "oedd angen help".

'Siomedig'

Dywedodd y Prif Gwnstabl Cynorthwyol Mark Travis: "Rydym yn trafod gyda'r rheiny sydd ar y safle i sicrhau eu bod yn dychwelyd adref yn ddiogel gan barchu trigolion lleol.

"Mae'r digwyddiad nawr yn gwasgaru ac mae'r rhai oedd yna wedi bod yn gadael trwy'r prynhawn."

Ychwanegodd: "Mae'n siomedig, ar un o ddiwrnodau mwyaf prysur y flwyddyn, bod angen symud gymaint o adnoddau o gefnogi cymunedau lleol er mwyn rheoli digwyddiad anghyfreithlon.

"Hoffwn ddiolch y gymuned leol am eu hamynedd a'u cefnogaeth."

Roedd y llu wedi cyhoeddi gorchymyn i ddargyfeirio pobl o'r safle, ac wedi cau rhai ffyrdd.

Mewn neges ar Facebook, roedd yna apêl, am "resymau diogelwch cyhoeddus", i bobl beidio mynd yno "ar droed nac mewn cerbydau".