Cau ward Ysbyty Tywyn: 'Beth am iechyd twristiaid o Loegr?'

Cafodd sylwadau Michael Fabricant eu disgrifio gan Liz Saville Roberts fel rhai "bron yn sarhaus"

Mae Aelod Seneddol o Loegr wedi cael ei feirniadu am gwestiynu sut y bydd twristiaid o Loegr yn cael "gofal iechyd iawn" yn dilyn cau rhan o Ysbyty Tywyn yng Ngwynedd.

Yr wythnos diwethaf fe gyhoeddodd Bwrdd Iechyd Betsi Cadwaladr y byddai'r ward cleifion mewnol yno'n cau dros dro, gan nad ydyn nhw wedi gallu recriwtio digon o nyrsys i weithio yno.

Mae'n golygu na fydd cleifion yn aros dros nos yno bellach, a dim ond apwyntiadau dydd fydd ar gael yn yr ysbyty.

Ond mewn trafodaeth yn San Steffan, dywedodd AS lleol Plaid Cymru fod y cwestiwn gafodd ei ofyn ar y mater yn un "bron yn sarhaus", a'i fod yn ceisio sgorio "ergyd wleidyddol rhad".

'Dim byd i'w wneud â nhw'

Yn ystod sesiwn Cwestiynau Cymreig yn Nhŷ'r Cyffredin dywedodd yr AS Ceidwadol Michael Fabricant, sy'n cynrychioli etholaeth Lichfield yng nghanolbarth Lloegr, ei fod ef a nifer o'i etholwyr yn ymweld â Thywyn yn achlysurol.

Wrth gyfeirio at gau'r ward i gleifion mewnol, gofynnodd i Ysgrifennydd Cymru, David Davies: "A wnewch chi siarad gyda Gweinidog Iechyd Cymru a thrafod sut y bydd twristiaid o Loegr yn cael gofal iechyd iawn pan maen nhw ar wyliau yng Nghymru?"

Dywedodd Mr Davies fod iechyd wedi ei ddatganoli i Gymru, ond y byddai'n "annog" gweinidogion Llafur Cymru i esbonio "pam nad ydyn nhw'n darparu'r un safonau o iechyd" a'r hyn oedd ar gael yn Lloegr, er gwaethaf yr "arian ychwanegol maen nhw'n ei gael".

Wrth ymateb yn ddiweddarach i'r sylwadau gafodd eu gwneud yn y siambr dywedodd AS Dwyfor Meirionnydd, Liz Saville Roberts bod trigolion yr ardal eisoes wedi cael eu "gadael i lawr" wedi i'r ward gau.

"Mae Cwestiynau Cymru'n aml yn cael eu defnyddio gan Geidwadwyr o etholaethau yn Lloegr i bregethu am faterion sy'n ddim byd i'w wneud gyda nhw, ond roedd cwestiwn heddiw bron yn sarhaus," meddai wrth PA.

"Dydy Tywyn a Bro Dysynni ddim yn gymunedau i gael eu defnyddio ar gyfer ergyd wleidyddol rhad.

"Mae twristiaeth yn ddiwydiant hynod o bwysig ym Meirionnydd.

"Ond mae'r sylw nawddoglyd yma'n dangos pa mor bwysig ydy o i ddatblygu model cynaliadwy o dwristiaeth, sy'n sicrhau'r budd economaidd a chymdeithasol gorau i bobl leol."

Symud cleifion i Ddolgellau

Yr wythnos diwethaf fe rannodd Betsi Cadwaladr ddatganiad yn dweud eu bod wedi "gweithio'n galed i recriwtio nyrsys newydd" ond eu bod bellach "wedi defnyddio pob opsiwn recriwtio".

"Er gwaethaf ein hymdrechion gorau, nid ydym wedi gallu recriwtio niferoedd digonol o nyrsys," meddai Ffion Johnstone, cyfarwyddwr cymunedol iechyd integredig ar gyfer gorllewin y bwrdd iechyd.

"Gyda diogelwch ein cleifion fel ein prif bryder, rydym wedi gwneud y penderfyniad anodd i gau'r ward yn Ysbyty Tywyn dros dro a chyfuno gwelyau cleifion mewnol yn Ysbyty Dolgellau i sicrhau cyflenwad nyrsio mwy cadarn.

"Bydd yr holl wasanaethau eraill - gan gynnwys apwyntiadau cleifion allanol - yn parhau fel arfer yn Ysbyty Tywyn."

Ychwanegodd y bwrdd iechyd y gallai unrhyw broses recriwtio er mwyn ailagor y ward cleifion mewnol gymryd rhai misoedd.

Mewn ymateb i sylwadau David Davies am arian ychwanegol i Gymru, dywedodd llefarydd ar ran Llywodraeth Cymru fod "ein cyllideb yn 2023/24 werth £900m yn llai mewn termau real na phan gafodd ei osod ar ddechrau'r adolygiad gwariant tair blynedd presennol".