Gwahardd cynghorydd am sylw 'Cymru i'r Cymry'

Yn ogystal â'i wahardd o'r cyngor tref am fis, argymhellodd fod Terry Davies yn dilyn cwrs hyfforddiant ar y cod ymddygiad.

Mae cynghorydd Plaid Cymru a alwodd dau gyd-gynghorwr yn "bobl o'r tu allan" wedi ei wahardd ar ôl dweud wrthyn nhw fod "Cymru ar gyfer y Cymry".

Yn ôl Pwyllgor Safonau Cyngor Sir Gâr roedd Terry Davies wedi defnyddio iaith wahaniaethol yn erbyn ei gyd-gynghorwyr Andre McPherson a Suzy Curry.

Penderfynodd y pwyllgor hefyd ei fod yn debygol o fod wedi rhegi ar Mr McPherson y tu allan i faes chwarae.

Roedd yr ombwdsmon wedi dweud yn flaenorol fod Mr Davies wedi galw'r aelodau Llafur yn "bobl o'r tu allan".

Y Cynghorydd Suzy Curry

Dywedodd ei fod yn ddiamheuol ei fod wedi dweud hynny a'i fod wedi eu galw'n "gynghorwyr galw heibio", gan ddweud: "Mae Cymru ar gyfer Cymry, ac mae gennym ni gymuned Gymreig yma."

Mae'r tri yn gwasanaethu ward Tyisha ar Gyngor Tref Llanelli.

Yn ôl y Gwasanaeth Adrodd ar Ddemocratiaeth Leol dywedodd y pwyllgor safonau y gallai'r cyhoedd fod wedi clywed y drafodaeth ar y maes chwarae, a ddigwyddodd ar 9 Chwefror, 2021.

Dywedwyd nad oedd Mr Davies wedi cael ei gam-drin gan y cynghorwyr Llafur, fel yr honnai.

Dywedodd y pwyllgor ei fod wedi cyfeirio ar Facebook at "ddau berson o'r tu allan y cefais sgwrs gref â nhw heddiw".

Ychwanegon nhw fod y sylw wedi'i gyfeirio at Mr McPherson a Ms Curry ac nid at ddau "gyffuriwr" o Loegr, fel yr oedd wedi honni. Fe gafodd y post ei ddileu yn ddiweddarach.

Mewn gwrandawiad ar 12 Ebrill, dywedodd bargyfreithiwr Mr Davies, David Daycock, fod ei gleient yn Gymro angerddol a oedd yn teimlo bod angen dod o ward Tyisha i ddeall y materion sydd yno.

Dywedodd Mr Daycock: "Efallai ei fod wedi gadael i'w emosiynau fod yn drech arno."

Y Cynghorydd Andre McPhersons

Ychwanegodd y dylai fod gan gynghorwyr "groen tewach a mwy o oddefgarwch", ac y dylai sylwadau Mr Davies fod wedi eu cymryd fel "rhan o'r ddadl wleidyddol".

Daeth adroddiad yr ombwdsmon i'r casgliad bod ymddygiad Mr Davies, y dirprwy faer ar y pryd ac sydd bellach yn gynghorydd sir, yn cynrychioli pedwar achos o dorri'r cod ymddygiad.

Penderfynodd y pwyllgor pe bai iaith Mr Davies wedi cael ei chlywed gan y cyhoedd y byddai wedi dwyn anfri ar swyddfa Mr Davies a'r cyngor tref.

Yn ogystal â'i wahardd o'r cyngor tref am fis, argymhellwyd ei fod yn dilyn cwrs hyfforddiant ar y cod ymddygiad.

Yn dilyn y penderyniaddywedodd Mr Davies nad oedd wedi rhegi na defnyddio iaith wahaniaethol, ac fod ganddo "lawer o gefnogaeth".

Gwrthododd Cyngor Tref Llanelli wneud sylw.