Pedwar person yn gwadu ceisio llofruddio yn Y Rhyl

Bu'r heddlu yn bresennol yn ardal Ffordd Cilgant, Y Rhyl, wedi'r digwyddiad mis diwethaf

Mae pedwar person wedi gwadu ceisio llofruddio yn dilyn ymosodiad honedig yn Y Rhyl fis diwethaf.

Bydd Sharon Roberts, 37, a Paige Roberts, 19, o Drelogan, ynghyd â Callum Parker, 18, o'r Rhyl, a bachgen 17 oed, yn ymddangos o flaen Llys y Goron yr Wyddgrug ym mis Hydref.

Dioddefwr honedig y digwyddiad ar Ffordd Cilgant ar 9 Ebrill oedd Ryan Vincent.

Mae'r bachgen 17 oed hefyd wedi'i gyhuddo o fod ag arf yn ei feddiant, ac ynghyd â Mr Parker mae'n wynebu cyhuddiad o geisio gwyrdroi cwrs cyfiawnder.

Mae Liam Babbs, 24, a Fredrick White, 18, o'r Rhyl hefyd wedi'u cyhuddo o geisio gwyrdroi cwrs cyfiawnder.

Maen nhw oll yn parhau i gael eu cadw yn y ddalfa yn y cyfamser.