Arestio dyn yn Abertawe wedi i berson gael ei drywanu

Mae'r heddlu wedi cau y ffordd i'r ddau gyfeiriad wrth i'r digwyddiad barhau

Mae Heddlu De Cymru wedi arestio dyn yn dilyn adroddiad bod person wedi cael eu trywanu yng nghanol Abertawe yn oriau mân fore Mawrth.

Cafodd y gwasanaethau brys eu galw i Stryd yr Undeb toc cyn 03:50.

Dywedodd yr heddlu fod y person dan amheuaeth o gyflawni'r drosedd honedig wedi ffoi i gyfeiriad Y Strand, ac fe gafodd y ffordd honno ei chau am rai oriau ddydd Mawrth wrth i'r digwyddiad fynd yn ei flaen yno.

Ychwanegodd y Gwasanaeth Ambiwlans fod un person wedi ei gludo i Ysbyty Treforys am driniaeth, ac nid oes rhagor o wybodaeth am ei gyflwr ar hyn o bryd.

Mae dyn 33 oed bellach wedi ei arestio ar amheuaeth o geisio dwyn, ac o ymosod, ac mae'n parhau yn y ddalfa.

Dywedodd yr Arolygydd James Wilson fod dyn wedi mynd i do adeilad Y Strand yn dilyn y digwyddiad honedig o drywanu, a bod y strydoedd cyfagos wedi eu cau oherwydd hynny.

"Daeth y digwyddiad i ben yn saff am tua 14:10 y prynhawn, gyda chymorth trafodwyr yr heddlu," meddai.

"Hoffem ddiolch i bawb am eu hamynedd wrth i'r gwasanaethau brys wneud eu gwaith."

Ychwanegodd fod yr ymchwiliad yn parhau i'r digwyddiadau.