'Siomedig' bod chwyddiant yn aros yn yr unfan

Mae chwyddiant wedi aros yn yr unfan - 8.7% - yn y flwyddyn hyd at fis Mai, yn groes i'r disgwyl.

Roedd y ffigwr yr un peth fis Ebrill ac mae pobl yn dal i wynebu costau uwch.

Mae'n golygu fod rhywbeth oedd yn costio £1 fis Mai diwethaf yn costio, ar gyfartaledd, tua £1.08 eleni.

Mae prisiau bwyd wedi codi ers y llynedd

Mae Banc Lloegr yn wynebu mwy o bwysau, o ganlyniad, i godi cyfraddau llog eto er mwyn ceisio rheoli chwyddiant.

Dywedodd Ysgrifennydd Cymru David TC Davies ei fod yn "siomedig".

Beth yw chwyddiant a chyfraddau llog?

Chwyddiant yw faint mae prisiau'n codi dros gyfnod o amser.

Mae'n cael ei fesur gan y Swyddfa Ystadegau ac mae'r data'n cael ei ryddhau bob mis.

Mae Banc Lloegr wedi bod yn cynyddu cyfraddau llog i geisio dod â chwyddiant i lawr.

Y syniad yw ei gwneud hi'n fwy drud i fenthyg arian ac annog pobl i arbed arian.

Os nad yw pobl yn gwario gymaint, mae'r raddfa y mae prisiau'n cynyddu yn arafu wrth i gwmnïau gystadlu.

Ond mae hynny'n gydbwysedd anodd, gyda chyfraddau llog uwch yn golygu cynnydd mewn morgeisi, er enghraifft.

Dywedodd y Swyddfa Ystadegau Gwladol mai costau teithio mewn awyren, ceir ail-law a phrisiau nwyddau a gwasanaethau hamdden wnaeth gyfrannu at y cynnydd mwyaf ym mis Mai.

Fe wnaeth prisiau bwyd a diod di-alcohol gynyddu ym Mai eleni ond roedden nhw'n dal yn llai na Mai 2022.

Roedd pris petrol a disel yn is eleni na'r un cyfnod y llynedd.

Mae pris petrol a disel yn gostwng yn ôl y Swyddfa Ystadegau Gwladol

Roedd arbenigwyr wedi darogan y byddai chwyddiant yn gostwng, fel yr eglurodd yr economegydd Athro Dylan Jones Evans ar Dros Ginio ar Radio Cymru ddydd Mercher.

"Mi oedd 'na ddisgwyliadau i chwyddiant ddod i lawr i ddangos fod y llwybr i chwyddiant dros y chwe i naw mis nesa' yn mynd i lawr a ddim yn mynd i fyny."

Mae disgwyl i Fanc Lloegr godi cyfraddau llog ddydd Iau.

"Mae'n broblem fawr i ddelio â hyn... a ma' yfory [ddydd Iau] yn mynd i fod yn benderfyniad diddorol.

"Mae rhai'n dweud maen nhw'n mynd i godi o 0.25% fel maen nhw 'di 'neud dros y misoedd diwethaf a rhai'n dweud wel 'pam ddim ei godi o 0.5% i gael chwyddiant o dan rhyw fath o control ond does na'm guarantee o hynny a gwbl."

Dadansoddiad Gohebydd Busnes BBC Cymru, Huw Thomas

Mae chwyddiant yn ystyfnig o uchel o hyd.

Tra bod ambell bris yn gostwng - fel tanwydd - mae costau byw yn parhau'n heriol.

Yr arf mwyaf i ddod i'r afael â chwyddiant yw cynyddu cyfraddau llog, ac mae disgwyl i Fanc Lloegr fynd amdani yfory.

Ond mi fydd hyn y peri pryder i bawb sydd â morgais.

Tra bod y mwyafrif o bobl gyda morgeisi am dymor penodol - fixed term - mae miliynau ohonynt yn mynd i orfod cyrraedd cytundeb newydd o fewn y misoedd nesaf.

Fe fydd y gost yn fisol yn uwch, a'r esgid ariannol yn parhau i wasgu'n dynn.

'Siomedig ond cyfeiriad cywir'

Fe wnaeth Ysgrifennydd Cymru, David TC Davies ddweud fod ffigyrau chwyddiant yn "siomedig" a bod y gostyngiad yn arafach na'r disgwyl.

Dywedodd David TC Davies fod chwyddiant yn "mynd yn y cyfeiriad cywir" ond yn arafach nag y byddai'n ei hoffi

"Maen nhw yn gostwng yn gyffredinol, maen nhw wedi dod lawr o 10% i 8.7% felly maen nhw'n mynd yn y cyfeiriad cywir, ond ddim mor gyflym ag y bydden ni i gyd yn ei hoffi.

"Dyna pam mae'n bwysig fod y Llywodraeth [y DU] yn ffocysu ar chwyddiant, dyna pam mae'n rhaid i ni fod yn ofalus iawn am gytuno ar godiad cyflog o 20, 30% neu'n uwch."