Teyrnged i ddyn 'anhygoel' fu farw mewn gwrthdrawiad ger Bedwas

Dywedodd teulu Darrel King ei fod yn "fab, tad, ewythr a thaid anhygoel"

Roedd dyn a fu farw mewn gwrthdrawiad yn Sir Caerffili ar 7 Gorffennaf yn cael ei "garu gan bawb oedd yn ei adnabod", medd ei deulu.

Bu farw Darrel King, 60 o Gaerffili, mewn gwrthdrawiad rhwng dau feic modur a char ar yr A468 ger Bedwas.

Cafodd dyn 70 oed o Gaerffili oedd hefyd yn rhan o'r gwrthdrawiad ei gludo i Ysbyty Athrofaol Cymru yng Nghaerdydd, ac mae nawr mewn cyflwr sefydlog ac yn derbyn triniaeth mewn ysbyty arall.

Mewn teyrnged i Mr King dywedodd ei deulu: "Roedd Darrel yn fab, tad, ewythr a thaid anhygoel a oedd yn caru bywyd ac roedd wedi'i garu gan bawb oedd yn ei adnabod.

"Fel teulu rydym i gyd yn dorcalonnus yn dilyn ei farwolaeth sydyn a thrasig ac rydym yn gweld ei eisiau bob dydd.

"Hoffwn gymryd y cyfle yma i ddiolch i'r rheiny a stopiodd i gynnig cymorth ac i'r holl wasanaethau brys am bopeth ceision nhw ei wneud i'w helpu."

Dywedodd Heddlu Gwent fod teulu Mr King yn parhau i dderbyn cymorth arbenigol.

Mae Heddlu Gwent yn parhau i apelio ar unrhyw dystion oedd yn teithio ar yr A468 rhwng cylchfan Cedar Tree a Bedwas rhwng 17:30 a 18:30 ar 7 Gorffennaf i gysylltu gyda nhw.