Gwesty lloches: Gohirio cais am orchymyn llys

Dywedodd y barnwr y dylai'r trigolion lleol gael cyfle i fynegi'u barn yn y llys

Mae barnwr yn yr Uchel Lys wedi gohirio penderfyniad ar gais am orchymyn llys gan berchnogion gwesty sydd wedi'i glustnodi i gartrefu ymgeiswyr lloches yn Llanelli.

Dywedodd y barnwr ei fod wedi derbyn negeseuon gan nifer o drigolion sy'n byw gerllaw Gwesty Parc y Strade.

Mae Gryphon Leisure, perchnogion y gwesty, am i'r Barnwr Roger ter Haar gyhoeddi gorchymyn dros dro ar frys i atal pobl rhag tresmasu neu brotestio ar y safle.

Yn y gwrandawiad Uchel Lys yn Llundain ddydd Mawrth, dywedodd y barnwr ei fod wedi derbyn nifer o negeseuon personol, a bod "yn amlwg deimladau cryfion yn lleol".

Ychwanegodd y barnwr ei fod am i'r bobl oedd wedi ei e-bostio gael y cyfle i fynd i'r llys a chael y cyfle i wneud datganiadau.

Dywedodd hefyd y dylai cyfreithwyr perchnogion y gwesty gael y cyfle i ystyried barn y trigolion, a'i fod felly am ystyried yr achos ddydd Iau.

Dywedodd y Barnwr ter Haar: "Rwyf wedi derbyn nifer o e-byst gan drigolion lleol.

"Mae'r rhai sydd wedi ysgrifennu ataf yn mynegi'u hunain yn dda ac yn ymwybodol o bryderon lleol."

Roedd cyfreithwyr Gryphon wedi dweud wrtho fod protestwyr yn erbyn cartrefu ymgeiswyr lloches dros dro yn y gwesty.

Fe ddywedon nhw fod protestio wedi cychwyn yn gynnar ym mis Mehefin, a bod protestwyr wedi bod yn arddangos sloganau "hiliol a sarhaus" ac yn chwifio baneri'r Undeb a Chymru.