Dathlu 20 mlynedd o wylio gweilch yn Nyffryn Glaslyn

Cafodd y gweilch cyntaf eu gweld yn bridio yn ardal Porthmadog ar ddechrau'r 2000au

Mae hi'n benwythnos o ddathlu yn Nyffryn Glaslyn wrth iddyn nhw nodi 20 mlynedd o wylio gweilch y pysgod yn yr ardal.

Mae elusen Bywyd Gwyllt Glaslyn yn 10 mlwydd oed hefyd, a bydd Gŵyl y Gweilch yn cael ei chynnal i nodi hynny ym Mhorthmadog.

"Mae ganddon ni stondinau, digon o gacennau, gweithgareddau i blant, ond mae gennym ni hefyd gyfres o sgyrsiau gan arbenigwyr ar weilch, a hefyd ar hanes Glaslyn," meddai Becky Phasey, swyddog addysg canolfan Bywyd Gwyllt Glaslyn.

Roedd cywion bach yn cael eu magu yn nyth Aran ac Elen ychydig fisoedd yn ôl

"Dwi ddim yn meddwl fod y bobl oedd yn gwylio'r adar pan gafon nhw eu gweld yn bridio am y tro cyntaf yn 2004 yn meddwl y byddan ni dal yma'n sefyll fel elusen hyd heddiw.

"Nid yn unig yn gwarchod y gweilch, ond bod 'na weilch eraill hefyd wedi dod i'r dyffryn ac yn bridio'n llwyddiannus.

"Mae hi'n edrych yn addawol iawn a 'da ni'n gobeithio y bydd y boblogaeth yn cynyddu'n raddol o flwyddyn i flwyddyn.

"Mae 'na ddigon o weilch o gwmpas - 'da ni'n gwybod hynny - a gobeithio y byddan nhw'n ffeindio nyth."

Mae'r adar oedd yn gywion ychydig fisoedd yn ôl bellach wedi tyfu tipyn yn fwy!

Ychwanegodd Ms Phasey ar raglen Dros Frecwast fore Sadwrn fod y ffaith bod yr elusen hefyd yn dathlu degawd yn dangos ymdrechion clodwiw gwirfoddolwyr a phobl leol.

"Yr RSPB oedd yn gyfrifol am warchod y gweilch i ddechrau, ond mi oedd y gymuned leol yn rhan fawr iawn o hynny, ac yn gwirfoddoli i warchod y nyth," meddai.

"Wedyn pan 'naeth yr RSPB benderfynu cymryd cam yn ôl, mi oedd y gymuned yn teimlo'n gryf iawn dros aros a sefydlu elusen newydd i warchod y gweilch.

"Mae'n brosiect sy'n dangos be' sy'n bosib pan mae cymuned yn dod at ei gilydd a gwneud rhywbeth cadarnhaol.

"Dwi'n meddwl ei fod yn achos dathlu ac yn profi i bobl fod prosiectau gwarchod bywyd gwyllt yn gallu gweithio."