Rosie Hughes: Y swyddog carchar sy'n seren ar y Cae Ras

Rosie Hughes yw un o ymosodwyr mwyaf llwyddiannus tîm pêl-droed Merched Wrecsam.

Aeth o chwarae am ddim i arwyddo cytundeb lled-broffesiynol gyda'r clwb, a rhwydo 97 gôl yn ystod ei 41 gêm i'r tîm.

Yn ddiweddar mae hi wedi chwarae o flaen torfeydd o filoedd ar y Cae Ras, a chyfarfod y sêr Hollywood sy'n berchen y clwb.

Ond i Hughes, 27, mae 'na ochr wahanol iawn i'w bywyd hefyd - gan ei bod yn gweithio fel swyddog yng Ngharchar y Berwyn yn y ddinas.

Mae'r ddwy swydd yn cyfuno llawer o sgiliau, meddai, ond dim ond yn ddiweddar mae carcharorion wedi dod i wybod am ei bywyd y tu allan i'r gweithle.

"Ddim fy mod i erioed yn swil am chwarae i Wrecsam, ond mi o'n i yn ei gadw i mewn," meddai.

"Ond roedd yna gyfweliad ges i pan oeddwn i ar y Cae Ras gyda Ryan Reynolds aeth ar Football Focus ar y teledu.

Rob McElhenney, Rosie Hughes a Ryan Reynolds ar y Cae Ras yn Wrecsam

"Dechreuodd y peth gael ei drafod, ac unwaith mae rhywbeth yn cael ei drafod yn y carchar mae'n gyffrous, mae'n rhywbeth newydd i siarad am.

"O'dd carcharorion yn dod i fyny ata i a gofyn 'Wyt ti'n chwarae i Wrecsam?' a doeddwn i'n methu ei guddio yn y diwedd."

Roedd tîm y merched yn rhan o'r fargen pan brynodd y sêr Hollywood, Reynolds a Rob McElhenney y clwb yn 2021.

Ac mae'r merched wedi profi llwyddiant ers hynny hefyd, gan ennill eu lle yn haen uchaf pêl-droed Cymru a symud i fodel lled-broffesiynol.

Enillodd y tîm cynghrair Adran Gogledd ym mis Mawrth

Cafodd Hughes gyfarfod Reynolds am y tro cyntaf ar ôl i'r tîm ennill cynghrair Adran Gogledd ym mis Mawrth.

"Roeddwn i'n teimlo fel seren," dywedodd.

"Oherwydd o'n i newydd sgorio'r gôl dyngedfennol ar faes y Cae Ras o flaen bron 10,000 o bobl, felly pan wnaeth o [Reynolds] fy nghyflwyno i'w wraig a'i blant roedden i'n teimlo fel mai fi oedd y seren!"

• Wrecsam eisiau torri tir newydd i bêl-droed merched

• ‘Methu disgwyl i weld pêl-droed merched mewn 10 mlynedd’

Yn ôl ar safle'r carchar, mae Hughes yn manteisio ar gyfleusterau'r safle mawr er mwyn ymarfer yn ystod ei hamser cinio.

Mae wedi bod yn gweithio yno ers chwe blynedd ac mae'n dweud bod tipyn o sgiliau sy'n berthnasol i'w ddwy swydd.

"Mae'n bendant angen rhywfaint o wydnwch, sgiliau cyfathrebu da, bod yn wrandäwr gwych a thipyn o ddeallusrwydd emosiynol i wneud y swydd," dywedodd.

"Mae cyfathrebu a gweithio fel rhan o dîm yn hollbwysig ar gyfer pêl-droed a bod yn swyddog carchar.

"Mae angen hyder yn y swydd yma... mae'r un peth gyda phêl-droed, mae'n rhaid i chi fod yn hyderus ar y bêl.

"Dwi'n dda ar sgorio goliau a rhoi'r bêl yng nghefn y rhwyd oherwydd dwi'n hyderus wrth wneud hynny."

Gobaith Hughes ydy gallu canolbwyntio fwy ar ei gyrfa bêl-droed

Cyn i'r clwb ddechrau cynnig cytundebau lled-broffesiynol yn yr haf, dywedodd Hughes ei bod wedi ystyried cynigion i chwarae i glybiau eraill.

Ond fe wnaeth sgwrs gyda therapydd y clwb ei helpu i wneud penderfyniad.

Dywedodd: "Roedd rhywbeth oedd yn fy nghadw i yn Wrecsam, dwi ddim yn siŵr falle ei fod oherwydd o'dd fy nhad yn eu cefnogi.

"Dwi mor falch a hapus wnes i aros hefo Wrecsam er nad oeddwn i'n cael fy nhalu... dyna oedd y penderfyniad cywir."

Lleihau oriau gwaith

Bellach ar gytundeb lled-broffesiynol ac yn cael ei thalu, mae Hughes yn gobeithio y bydd ganddi fwy o amser i ganolbwyntio ar ei phêl-droed.

"Tymor diwethaf mi oedd o ychydig yn anodd," meddai.

"Roedd hi'n anodd cael amser i ffwrdd ar gyfer pob gêm felly roedd cwpl [o gemau] 'nes i eu colli yn ystod y tymor."

"Dwi wedi gofyn i leihau fy oriau fel swyddog carchar - mae'r Gwasanaeth Carchardai yn gallu bod yn dda fel yna.

"Felly dwi wedi gofyn i wneud hynny a gobeithio rhywbryd yn y dyfodol alla' i ganolbwyntio mwy ar fy mhêl-droed, dyna fyswn i'n caru ei wneud."

Mae Wrecsam wedi cael dechrau da yn yr Adran Premier y tymor hwn, gan eistedd ar frig y gynghrair wedi tair gêm.

Mae Hughes wedi sgorio saith gôl hyd yma, gan gynnwys pob un o goliau Wrecsam yn eu buddugoliaeth o 5-1 yn erbyn Y Barri.