Teyrnged i fenyw wedi gwrthdrawiad beic a lori Sir Gâr
- Cyhoeddwyd
Mae teulu menyw 52 oed a fu farw wedi gwrthdrawiad yn Sir Gaerfyrddin wedi rhoi teyrnged iddi.
Bu farw Nicolette Lewis, a oedd ar feic ar y pryd, mewn gwrthdrawiad gyda lori ar yr A476 rhwng Temple Bar a Ffairfach ar 9 Hydref.
Mewn datganiad, dywedodd ei theulu: "Rydym eisiau diolch i bawb am eu cefnogaeth a'u negeseuon caredig.
"Hi oedd ein byd. Does dim geiriau yn ystod y cyfnod anodd hwn."
"Rydym yn gofyn i bawb roi amser i alaru ac i ddod i dermau gyda'r golled drasig hon o'n mam a gwraig."
Dywedodd Heddlu Dyfed-Powys y bu farw Ms Lewis yn y fan a'r lle.
Mae'r llu yn apelio ar unrhyw un sydd â gwybodaeth am y digwyddiad i gysylltu â nhw.