Mudiad Meithrin yn galw am beidio torri cyllid sector gofal plant

Mae angen amddiffyn y sector gofal plant rhag toriadau, yn ôl Prif Weithredwr Mudiad Meithrin.

Yn ôl Dr Gwenllian Lansdown Davies, mae'r maes yn un sydd wedi cael ei "dan-ariannu ers blynyddoedd" ac wedi wynebu her recriwtio "ers degawdau".

Mae pryderon y gallai'r sefyllfa waethygu gyda thoriadau arfaethedig Llywodraeth Cymru.

Fe ddaw sylwadau Ms Davies wedi i Lywodraeth Cymru gyhoeddi y byddai'r sector, fel sawl un arall, yn wynebu toriadau.

Dyw union fanylion y toriadau ddim yn glir eto.

Yn ôl Llywodraeth Cymru, maen nhw'n cydnabod ac yn gwerthfawrogi gwaith pwysig y sector gofal plant wrth gefnogi plant a theuluoedd.

Fe enillodd Cylch Meithrin Pontrhydfendigaid wobrau Cylch Meithrin Gorau y De-Orllewin, Arweinydd gorau a'r Cynorthwydd gorau

Yng ngwobrau Cylchoedd Meithrin Cymru ganol mis Hydref, Cylch Meithrin Pontrhydfendigaid yng Ngheredigion ddaeth i'r brig fel Cylch Meithrin gorau Cymru.

Yn ogystal â hynny, fe enillon nhw wobrau Cylch Meithrin Gorau y De-Orllewin, Arweinydd gorau a Chynorthwydd gorau.

Yn ôl Gwen Davies, mae'n anodd dod o hyd i staff gyda'r cymwysterau priodol

Ond dyw cyrraedd uchelfannau'r sector gofal plant ddim wedi bod heb eu heriau, yn ôl Gwen Davies, arweinydd Cylch Meithrin Pontrhydfendigaid.

"Ma' cael aelod arall o staff banc sydd gyda cymhwyster yn anodd iawn i'w ffeindio," meddai.

"Ma' hi wedi bod yn bach o struggle i ffeindio rhywun i ddod i weithio 'ma gyda cymwysterau. Mae'n anodd iawn ffeindio nhw."

Gyda rhagor o doriadau i ddod, mae Gwen yn poeni am beth allai ddod rownd y gornel.

Mae nifer o gylchoedd meithrin yn ei gweld hi'n anodd recriwtio staff

"Ni gyd yn poeni. Ma' gyda ni gyd deuluoedd, a pethe i'w dalu. Mae e yn becso ni gyd," meddai.

"Ni wedi bod yn lwcus iawn gyda llawer o grantiau. Ond fi'n gwbod ar un adeg roedd cylchoedd meithrin ar eu pengliniau, dim arian yn y cyfrif banc a ddim yn gwbod ble fydde'r arian i'n talu ni yn dod o nesa."

Mae'n ddarlun sy'n cael ei ategu gan Gwawr Evans, cadeirydd Cylch Meithrin Pontrhydfendigaid.

"Os oes salwch gyda'r staff, yn anffodus falle ni'n gorfod cau yn y prynhawn neu mae rhai aelodau o'r pwyllgor yn gorfod dod mewn i helpu. Felly ydy, mae yn her ar hyn o bryd."

Galw am beidio â chyflwyno toriadau i'r sector gofal plant mae Prif Weithredwr Mudiad Meithrin Cymru, Dr Gwenllian Lansdown Davies.

"Mi fydda rywun yn gobeithio y bydda gofal plant fel maes sydd heb dderbyn llawer o fuddsoddiad yn draddodiadol, yn cael ei amddiffyn, oherwydd 'da ni fel mudiad, fel mudiadau eraill, wedi bod yn uchel ein cloch ar hyd y blynyddoedd bod angen mwy o fuddsoddiad.

"Yr angen i recriwtio i mewn i'r sector, yr angen i 'neud yn siŵr bod gyda ni bobl sydd yn gymwys, pobl sydd â sgiliau iaith."

Mae Llywodraeth Cymru yn dweud eu bod yn buddsoddi dros £170m yn y maes

Mewn datganiad fe ddywedodd Llywodraeth Cymru eu bod yn buddsoddi dros £100m mewn darpariaeth gofal plant trwy gynlluniau Dechrau'n Deg a'r Cynnig Gofal Plant.

Mae £70m hefyd yn cael ei wario mewn buddsoddiad cyfalaf yn y sector, ac maen nhw hefyd yn darparu cymorth uniongyrchol i'r gweithlu drwy hyfforddiant a datblygu.

Mae'r llywodraeth hefyd yn dweud bod safleoedd gofal plant sydd wedi eu cofrestru yn cael rhyddhad o 100% ar drethi busnes.

Byddan nhw'n parhau i weithio gyda Gofal Cymdeithasol Cymru, meddai'r llywodraeth, i hyrwyddo cyfleoedd gwaith o fewn y sector gofal plant.