Dyn wedi marw yn dilyn gwrthdrawiad ar yr A483
- Cyhoeddwyd
Digwyddodd y gwrthdrawiad mewn cilfan ar yr A483 rhwng cyffyrdd 3 a 4
Mae dyn wedi marw yn dilyn gwrthdrawiad mewn cilfan ar yr A483 yn Wrecsam.
Cafodd Heddlu Gogledd Cymru eu galw am oddeutu 01:20 ddydd Gwener i wrthdrawiad rhwng dau gerbyd - Ford Transit Connect glas a cherbyd nwyddau trwm a oedd wedi parcio mewn cilfan.
Cafodd gyrrwr y fan ei gyhoeddi'n farw ar y safle rhwng cyffyrdd 3 a 4.
Mae'r ffordd yn parhau ar gau er mwyn i ymchwiliadau fforensig gael eu cynnal.
Mae Heddlu Gogledd Cymru yn apelio am dystion ac yn annog unrhyw un sydd â gwybodaeth i gysylltu â swyddogion Uned Plismona'r Ffyrdd drwy'r wefan neu ffonio 101, gan ddyfynnu'r rhif Q008585.