Dyn a gafodd ei ganfod yn farw mewn afon wedi boddi - cwest

Cafodd Joshua Shaw ei weld yn mynd i'r afon ym Mhontypridd ar 27 Rhagfyr

Mae cwest wedi agor i farwolaeth dyn 23 oed a gafodd ei ganfod yn farw mewn afon.

Cafodd Joshua Shaw, o Donyrefail, Porth, ei weld gan yr heddlu yn neidio i'r Afon Taf ym Mhontypridd toc wedi 18:00 ar 27 Rhagfyr 2023.

Cafwyd hyd i'w gorff yn yr afon yn ardal Gwaelod-y-garth ar gyrion Caerdydd ar 4 Ionawr.

Boddi oedd achos y farwolaeth, clywodd y cwest, wrth ddisgwyl am adroddiad tocsicoleg.

• Canfod corff wrth chwilio am ddyn yn Afon Taf

• Chwilio'n parhau am ddyn 23 oed a aeth i Afon Taf

Nododd y crwner fod yr afon yn llifo'n gyflym iawn ar noson 27 Rhagfyr.

Dywedodd Heddlu De Cymru yn gynharach fod Mr Shaw yn dianc oddi wrth heddweision ar y pryd, a oedd yn ceisio siarad gydag ef am rywbeth oedd wedi digwydd ddyddiau ynghynt.

Cafodd y cwest, yn Llys Crwneriaid Pontypridd, ei ohirio tan ddyddiad diweddarach.

Anfonodd y crwner Kerrie Burge ei chydymdeimlad at deulu Mr Shaw.