Cymro Cymraeg yng Nghwpan Asia yn 'neud o i mam'

Mae Gethin Jones wedi chwarae yn nwy o dair gêm Awstralia hyd yma yng Nghwpan Asia

Mae Cymro Cymraeg sydd wedi penderfynu chwarae pêl-droed i dîm cenedlaethol Awstralia wedi dweud y byddai ei fam, a fu farw yn 2022, yn falch o'i benderfyniad.

Ddechrau'r mis cafodd Gethin Jones, sy'n chwarae i Bolton Wanderers, ei enwi yng ngharfan y Socceroos ar gyfer Cwpan Asia.

Er iddo gael ei fagu ym Mhorthmadog, fe anwyd Gethin yn ninas Perth yng ngorllewin Awstralia, ac mae wedi dewis cynrychioli'r wlad honno.

• Cymro Cymraeg i gynrychioli Awstralia yng Nghwpan Asia

Yn siarad ar raglen Ar y Marc BBC Radio Cymru fore Sadwrn dywedodd Gethin fod cynrychioli Awstralia "wedi bod yng nghefn meddwl fi ers i fi fod yn hogyn bach".

Ychwanegodd ei fod yn teimlo balchder yn chwarae dros Awstralia am fod ei fam yn caru'r wlad ar ôl treulio cymaint o amser yno.

Bu farw mam Gethin, Karen Jones, yn 56 oed yn 2022 yn dilyn brwydr gyda Chlefyd Motor Niwron.

"I fi, oedd o [cynrychioli Awstralia] yn rhywbeth i fod yn proud ohono fo - 'neud o i mam 'fyd," meddai.

"Even pan o'n i yn chwarae dros Gymru pan o'n i'n ifanc, o'dd hi o hyd yn d'eud 'be am chwarae i Awstralia?'

"So pan ges i'r alwad, o'n i'n gw'bod fysa mam yn rili proud, a dwi jysd isio g'neud yn dda er mwyn fy nheulu, ac yn enwedig i mam."

Bydd Gethin Jones ac Awstralia yn herio Indonesia yn rownd yr 16 olaf ddydd Sul

Ychwanegodd fod cynrychioli Awstralia yn un o brif gystadlaethau Asia wedi bod yn "brofiad rili da - lot yn wahanol i be' dwi 'di 'neud o'r blaen".

Bydd Awstralia yn herio Indonesia yn rownd yr 16 olaf ddydd Sul, ar ôl trechu India a Syria a chael gêm gyfartal gydag Uzbekistan yn eu grŵp.

Fe wnaeth Gethin ddechrau a chwarae'r 90 munud llawn yn y ddwy fuddugoliaeth.

Os ydy Awstralia yn llwyddo i drechu Indonesia, fe fyddan nhw'n wynebu un ai De Corea neu Saudi Arabia yn rownd yr wyth olaf.

Mae Gethin Jones yn is-gapten i Bolton Wanderers yn Adran Un

Ar ôl cael ei eni yn Awstralia, symudodd y teulu yn ôl i Gymru pan oedd Gethin yn ifanc.

Er iddyn nhw fynd yn ôl yno'n gyson i ddechrau, dywedodd Gethin nad oedd wedi bod yn Awstralia ers ei arddegau cynnar - pan ddechreuodd yn nhimau ieuenctid Everton.

Bellach yn is-gapten i Bolton Wanderers yn Adran Un, mae'r amddiffynnwr 28 oed wedi ennill capiau i dimau ieuenctid Cymru.

Ond er iddo hyfforddi gyda thîm cyntaf Cymru yn 2016, ni enillodd gap llawn ac felly roedd yn rhydd i newid ei wlad gofrestredig.

Dywedodd ei fod wedi cael cyfarfod gydag is-reolwr Awstralia René Meulensteen ychydig fisoedd yn ôl, ble penderfynodd Gethin y byddai'n awyddus cynrychioli'r Socceroos.

Roedd Gethin Jones (chwith) wedi chwarae dros dimau ieuenctid Cymru

Ond am ei fod wedi bod yn rhan o garfan Cymru yn y gorffennol, ac wedi cynrychioli'r timau ieuenctid, roedd yn rhaid gwneud cais i gorff llywodraethu pêl-droed FIFA er mwyn cael chwarae i Awstralia.

"Y pedair, bum mlynedd ddiwethaf, dwi heb gael galwad ffôn gan Gymru," meddai Gethin.

"Dim 'bo fi'n deud dim byd drwg am Gymru - maen nhw wedi bod yn 'neud yn brilliant.

"A mae 'na lot o chwaraewyr sy' yn position fi - right-back - yn 'neud yn unbelievable, fel Connor Roberts a Nico Williams, felly mae'n anodd i fi gael mewn yn fan'na.

"Felly a dweud y gwir, pan 'naeth Awstralia roi galwad i fi, o'dd o'n no brainer i fi er mwyn gallu chwarae ar yr international level."

Sioc o glywed Cymraeg

Ychwanegodd fod rhai o aelodau carfan Awstralia wedi cael sioc yn clywed Gethin yn ffonio adref a siarad Cymraeg, gyda rhai ohonynt ddim yn ymwybodol o fodolaeth yr iaith.

"Dwi'n codi'r ffôn a siarad Cymraeg, a maen nhw i gyd yn sbïo - 'sa rei ohonyn nhw ddim yn gwybod bod'na iaith Gymraeg yng Nghymru!" meddai.