Dyn o Borthmadog wedi marw tra'n rhwyfo ar draws yr Iwerydd

Michael Holt yn Pasito Blanco, Gran Canaria ddiwedd Ionawr, cyn iddo ddechrau ar ei daith dros yr Iwerydd

Mae dyn o Borthmadog oedd yn ceisio rhwyfo ar draws Cefnfor yr Iwerydd ar ei ben ei hun wedi marw yn ystod y daith.

Roedd Michael Holt, sydd â diabetes math 1, yn rhwyfo o Gran Canaria yn Sbaen i Barbados, ac yn codi arian dros ddwy elusen.

Daeth i'r amlwg bron i wythnos yn ôl fod Mr Holt, 54, wedi dechrau teimlo'n sâl ar y daith ac yna roedd pryder yn sgil trafferthion wrth geisio gwneud cysylltiad ag ef yn y dyddiau wedi hynny.

• Yr her o rwyfo 3,000 o filltiroedd dros yr Iwerydd

Yn ôl neges ar y cyfryngau cymdeithasol nos Sul, fe gafodd ei ddarganfod wedi marw yng nghaban ei gwch, dros 700 milltir o fan cychwyn y daith.

Dywedodd ei frawd, David ei fod yn "hynod falch" o Michael.

Nod Michael Holt oedd codi ymwybyddiaeth o ddiabetes math 1

Fe ddechreuodd her Mr Holt ar 27 Ionawr, ac mewn sgwrs gyda Cymru Fyw fe ddywedodd ei fod yn disgwyl i'r daith "gymryd rhwng 50-110 o ddyddiau".

Roedd yn rhagweld gorfod rhwyfo am dros 16 awr y dydd, a chael tua phedair awr o gwsg bob nos.

Doedd dim hofrennydd na chwch yn teithio gyda Mr Holt, ond roedd yn cadw mewn cysylltiad gyda chwmni oedd yn cadw golwg ar ei leoliad.

Gobaith Michael Holt oedd rhwyfo 3,000 o filltiroedd o Gran Canaria yn Sbaen i Barbados

Roedd perthnasau wedi mynegi pryder amdano yn yr wythnos ddiwethaf gan ddweud i ddechrau ei fod yn dioddef salwch môr, ag yntau ei hun yn amau "ymateb drwg i gymryd antibiotics".

O'r herwydd roedd wedi penderfynu peidio ag anelu at Barbados a mynd yn hytrach i ynysoedd Cape Verde, tua 300 milltir i'r de o'i leoliad ar y pryd.

Roedd hynny ddydd Mawrth 20 Chwefror, ond doedd dim ateb ganddo wedi hynny pan roedd ymdrechion i gysylltu â'r cwch.

Aeth awyrennau i'r ardal a gweld ei gwch am 06:30 fore Sul, ond doedd dim golwg o Mr Holt ar y dec, ac fe gafodd sawl cwch eu hanfon yno i ymchwilio.

Dywedodd brawd Michael, David, fod "be' mae o wedi'i gyflawni yn anhygoel"

Fe gyrhaeddodd llong bysgota oedd yn ddigon bach i fynd yn agos i'r cwch - yr oedd Mr Holt yn ei galw'n 'Mynadd' - ac yn ôl neges gan frawd Mr Holt, David "cafodd Michael ei ddarganfod wedi marw yn ei gaban" nos Sul.

Ychwanegodd: "Wrth gwrs, nid dyma'r canlyniad roedden ni'n dymuno, ond mae yna rywfaint o gysur o wybod ei fod wedi marw yn gwneud rhywbeth roedd wrth ei fodd yn ei wneud."

"Mae hyn yn sioc enfawr i mi, ei wraig Lynne a'i ferch Scarlett a fy rhieni, heb sôn am deulu ehangach a ffrindiau Michael.

"Diolch yn fawr am y geiriau a dymuniadau caredig eisoes yn y diwrnodau diwethaf. Maen nhw'n golygu llawer i'r teulu i gyd."

'Cyflawniad anhygoel'

Yn siarad gyda BBC Cymru ddydd Llun dywedodd David ei fod yn "hynod falch o Michael".

"Er be' sydd 'di digwydd, mae rhwyfo ar y môr agored am 24 diwrnod a theithio dros 700 o filltiroedd yn anhygoel," meddai.

"Mae'n debyg fod 'na reswm pam fod neb efo diabetes math 1 erioed wedi rhwyfo ar draws fôr yr Iwerydd.

"Ond pan mae Michael yn cael syniad yn ei ben, dyna fo. Ma' be' mae o wedi'i gyflawni yn anhygoel."