Etholiad 2019: Disgwyl 'brwydr ffyrnig' ym Môn

CaergybiChristopher Furlong

Mae Caergybi, cartref i ail borthladd mwyaf prysur y DU, o fewn etholaeth Ynys Môn

Gan Vaughan Roderick
Golygydd Materion Cymreig y BBC

Mae Ynys Môn yn etholaeth nodedig am sawl rheswm.

Hon oedd yr etholaeth wledig gyntaf i ethol aelod seneddol Llafur, yr etholaeth Gymreig gyntaf i ethol menyw a'r unig etholaeth i gael ei chynrychioli gan y pedair prif blaid Gymreig.

Mae hon hefyd yn etholaeth sy'n tueddu ond newid dwylo wrth i'w haelod seneddol ymddeol.

Pan gyhoeddodd Albert Owen felly ei fod am roi'r ffidl yn y to roedd h'n anorfod y byddai 'na frwydr ffyrnig i'w olynu.

Ble mae seddi targed Llafur a'r Ceidwadwyr?

Pleidleisiodd Môn o blaid gadael yr Undeb Ewropeaidd o fwyafrif bychan, ond gallasai union ffurf Brexit effeithio ar Gaergybi - sy'n ail i Dover yn unig fel porthladd fferi prysuraf y DU.

Fe fydd ffermwyr yr ynys hefyd yn awyddus i sicrhau'r cytundeb Brexit gorau posib.

Gyda'r cynlluniau ar gyfer atomfa newydd yn Wylfa a'r galwadau am drydedd bont ar draws y Fenai, mae hon yn etholaeth lle y gallai safon yr ymgeiswyr a phynciau lleol fod cyn bwysiced â'r frwydr ehangach pan ddaw hi'n bryd cyfri'r pleidleisiau.

Pwy sy'n sefyll?

  • Aled ap Dafydd - Plaid Cymru

  • Virginia Crosbie - Ceidwadwyr

  • Helen Jenner - Plaid Brexit

  • Mary Roberts - Llafur

Straeon perthnasol