Canolfan Gymraeg i Gaerdydd?

Byddai'r ganolfan Gymraeg yn Yr Hen Lyfrgell ar Yr Aes, ochr yn ochr ag Amgueddfa Stori Caerdydd

Gall canolfan Gymraeg gael ei datblygu yng nghanol Caerdydd.

Bwriad creu'r ganolfan yw dathlu a diogelu'r iaith, ynghyd â sicrhau bod gan drigolion ac ymwelwyr gyfle i siarad Cymraeg.

Bydd argymhelliad yn cael ei roi i aelodau cabinet Cyngor Caerdydd y dylen nhw gymeradwyo'r datblygiad yn yr Hen Lyfrgell mewn cyfarfod ddydd Iau.

Byddai'r ganolfan yn cael ei hariannu gan arian o gronfa gwerth £1.25m gan lywodraeth Cymru. Bwriad sefydlu'r gronfa yw datblygu canolfannau Cymraeg ar draws y wlad.

Pe bai'r cynllun yn mynd yn ei flaen, byddai'r ganolfan ochr yn ochr ag Amgueddfa Stori Caerdydd, sydd eisoes yn adeilad yr Hen Lyfrgell ar Yr Aes.

Ymysg y mudiadau fydd yn rhan o'r cynllun mae Prifysgol Caerdydd, fyddai'n rhedeg cyrsiau Cymraeg, Clwb Ifor Bach, fyddai'n trefnu perfformiadau gan fandiau Cymraeg, ac S4C, fyddai'n darparu offer rhyngweithiol i blant.

Os yw'r cynllun yn cael ei gymeradwyo, enw'r ganolfan newydd fyddai'r Hen Lyfrgell, a byddai'n cynnwys caffi, siop lyfrau, ystafelloedd dysgu, arddangosfeydd, manau perfformio ac ystafelloedd cynhadledda.