Ailagor Tafarn Sinc wedi ymgyrch gymunedol

Mae trigolion ardal Maenclochog a Rhosybwlch yng ngogledd Sir Benfro wedi bod yn dathlu ddydd Mawrth wrth i'r dafarn leol ailagor.

Ar ôl codi dros £325,000, y gymuned leol yw perchnogion newydd Tafarn Sinc.

Roedd pryder y byddai'r tafarn yn cau am byth ar ôl i'r cyn berchnogion fethu â dod o hyd i brynwr.

Yn wreiddiol cafodd y dafarn a bwyty ei rhoi ar y farchnad am £295,000.

Grwp cymunedol sydd nawr yn berchen ar Tafarn Sinc

Cafodd Cymdeithas Tafarn Sinc ei ffurfio ddiwedd Gorffennaf yn dilyn cyfarfod cyhoeddus ym Maenclochog, ac fe gafodd gefnogaeth yr actor Rhys Ifans.

Yn ôl cydlynydd y prosiect, y cynghorydd Cris Tomos, fe lwyddodd y fenter i godi £220,000 drwy werthu cyfranddaliadau.

"Y nod yw codi cronfa'r cyfranddaliadau i £375,200, a bydd modd prynu cyfranddaliadau tan o leiaf Mawrth 2018."

I ddathlu'r achlysur, Hefin Wyn, un o gyfarwyddwyr Cymdeithas Tafarn Sinc, wnaeth gyflwyno'r peint cyntaf i Ryan John, un o selogion y dafarn.