Swyddi gweithwyr Poundworld yn y fantol ar draws Cymru

Mae bygythiad i swyddi gweithwyr mewn 21 o siopau Poundworld ar draws Cymru ar ôl i'r cwmni fynd i ddwylo gweinyddwyr.

Daw'r cyhoeddiad wedi methiant trafodaethau gyda phrynwr posib dros y penwythnos.

Does dim cadarnhad faint yn union o bobl sy'n cael eu cyflogi yng Nghymru, ond mae gan y cwmni dros 5,000 o weithwyr drwy Brydain a chyfanswm o 355 o siopau.

Mae'r gweinyddwyr, Deloitte, yn ceisio dod o hyd i brynwr arall, ac yn pwysleisio na fydd unrhyw ddiswyddiadau na'r un siop yn cau ar hyn o bryd.

Dywedodd llefarydd ar ran y gweinyddwyr fod y busnes wedi dioddef yn sgil cynnydd uchel ym mhris cynnyrch, llai o gwsmeriaid ar y stryd fawr a chystadleuaeth ffyrnig ymhlith siopau nwyddau rhad.

Y farchnad yn 'heriol'

Ychwanegodd fod amodau'r farchnad yn dal yn "eithriadol o heriol" yn y DU gan ei gwneud hi'n amhosib i Poundworld ad-drefnu'r busnes.

"Rydym yn dal i gredu y gellir dod o hyd i brynwr ar gyfer y busnes neu o leiaf ran ohono, ac rydym yn gadael i staff wybod am ddatblygiadau fel ag y maen nhw'n digwydd," meddai'r llefarydd.

"Fe ddiolchwn i'r staff am eu cefnogaeth yn y cyfnod anodd yma."

Fel y mae enw'r cwmni'n ei awgrymu, £1 yw pris mwyafrif helaeth y nwyddau sy'n cael eu gwerthu yn ei siopau.

Mae'n masnachu dan frandiau Poundworld, Poundworld Plus neu Bargain Buys.

Daw'r newyddion ddyddiau wedi i House of Fraser gyhoeddi bwriad i gau 31 o'i siopau gan gynnwys dwy yng Nghymru.

Dyma'r rhestr lawn o'u siopau yng Nghymru:

• Abertawe - tair siop ym Mharc Manwerthu Pontarddulais, Parc Tawe a Pharc Manwerthu Phoenix;

• Bae Colwyn;

• Bangor;

• Bargoed;

• Brychdyn;

• Caerdydd - Canolfan Dewi Sant a Chanolfan Siopa Capitol;

• Caerfyrddin;

• Llanelli - dwy siop gan gynnwys un Bargain Buys;

• Llantrisant;

• Merthyr Tudful;

• Dwy siop yng Nghasnewydd;

• Queensferry;

• Y Rhyl;

• Dwy siop yn Wrecsam - gan gynnwys un Bargain Buys;

• Y Coed Duon.