Llywodraeth Cymru i dderbyn £1.2bn o arian ychwanegol

Mae Llywodraeth y DU wedi cyhoeddi y bydd Llywodraeth Cymru yn derbyn £1.2 biliwn yn ychwanegol o ganlyniad i'r cynnydd ar wariant ar y gwasanaeth iechyd yn Lloegr.

Ddydd Sul cyhoeddodd Theresa May y byddai Llywodraeth y DU yn buddsoddi £20 biliwn yn ychwanegol yn y Gwasanaeth Iechyd yn Lloegr erbyn 2023/24.

Daeth y cyhoeddiad yn y flwyddyn mae'r Gwasanaeth Iechyd Gwladol (GIG) yn dathlu ei ben-blwydd yn 70 oed.

O ganlyniad i'r cyhoeddiad, fe fydd Cymru nawr yn derbyn £1.2bn drwy fformiwla Barnett.

Mae fformiwla Barnett yn penderfynu ar lefel gwariant cyhoeddus yng Nghymru, Gogledd Iwerddon, a'r Alban gan ddyrannu cyllid yn ôl maint y boblogaeth a'r pwerau a ddatganolwyd iddynt.

'Angen gwario ar y gwasanaeth iechyd'

Llywodraeth Cymru fydd yn penderfynu sut bydd yr arian ychwanegol yn cael ei wario yng Nghymru.

• Pedwar o fyrddau iechyd Cymru wedi gorwario o £163m

• Mwy o arian i Betsi Cadwaladr daclo 'heriau sylweddol'

Dywedodd Ysgrifennydd Cymru, Alun Cairns, ei fod yn annog Llywodraeth Cymru i wario'r arian ychwanegol ar y gwasanaeth iechyd.

"Wrth i'r GIG ddathlu ei 70, rwy'n erfyn yn gryf ar Lywodraeth Cymru i wario'r arian ychwanegol yn strategol er mwyn sicrhau gwell canlyniadau iechyd yng Nghymru," meddai.

"Fe allai'r arian yma gael ei ddefnyddio i wella perfformiad yn y meysydd lle mae Cymru ar ei hôl hi."

Ymateb Llywodraeth Cymru

Dywedodd llefarydd ar ran Llywodraeth Cymru: "Ry'n yn croesawu penderfyniad hwyr Llywodraeth y DU - penderfyniad ry'n wedi bod yn gofyn amdano ers tro.

"Er ein bod yn croesawu cyllid ychwanegol, rhaid peidio anghofio petai y gyllideb yng Nghymru wedi tyfu yn unol â chwyddiant rhwng 2010-11 a 2019-20, mi fyddai'r gyllideb £4bn yn uwch na'r hyn yw hi heddiw.

"Bydd y penderfyniadau ynglyn â sut fydd y cyllid ychwanegol yn cael ei wario yn cael eu gwneud gan gabinet Llywodraeth Cymru."