Cwpan FA Lloegr: Casnewydd 2-0 Middlesbrough

Robbie Willmott yn dathlu gôl agoriadol Casnewydd yn erbyn Boro

Bydd Casnewydd yn wynebu'r cewri Manchester City ym mhumed rownd Cwpan FA Lloegr wedi iddyn nhw drechu Middlesbrough o 2-0.

Fe sicrhaodd goliau Robbie Willmott a Padraig Amond fuddugoliaeth gofiadwy arall i'r Alltudion ar Rodney Parade.

Roedd tîm Mike Flynn eisoes wedi curo Caerlŷr o'r Uwch Gynghrair yn y rownd ddiwethaf.

A'r wobr o guro Boro - sy'n bumed yn y Bencampwriaeth - fydd gêm gartref yn erbyn Man City yn y rownd nesaf.

• Middlesbrough 1-1 Casnewydd

• Cwpan FA Lloegr: Casnewydd 2-1 Caerlŷr

Tony Pulis (chwith), rheolwr Middlesbrough, a Mike Flynn, rheolwr Casnewydd - y ddau o ardal Pillgwenlli yn y ddinas

Mewn tywydd garw, ac ar gae anodd, y tîm cartref oedd yn bygwth fwyaf yn yr hanner cyntaf wrth iddyn nhw ddelio'n well gyda'r amodau.

Er mai di-sgôr oedd hi ar yr egwyl, doedd dim yn rhaid i'r cefnogwyr ddisgwyl yn hir am y gôl agoriadol.

Sgoriodd Willmott gydag ergyd nerthol wedi 47 munud, cyn i Amond ychwanegu ail 20 munud yn ddiweddarach.

'Diwrnod anferth'

Dywedodd cyn-ymosodwr Cymru, Iwan Roberts ar BBC Radio Cymru: "Maen nhw 'di rhoi gwers i dîm da ar sut i chwarae pêl-droed ar gae annifyr ac maen nhw'n llwyr haeddu mynd drwodd i'r rownd nesaf.

"Fe fydd hi'n ddiwrnod anferth i'r clwb. Wrth gwrs mai Man City fydd y ffefrynnau ond ni fydd Pep Guardiola a holl sêr City yn edrych 'mlaen i ddod lawr i Rodney Parade," meddai.

"Dwi ddim yn meddwl bydd cyflwr y cae yn grêt a gobeithio y bydd hi'n ddiwrnod anodd iddyn nhw. Bydd 'na'm llawer o gysgu i gefnogwyr Casnewydd cyn y gêm"

Ond doedd y canlyniad ddim yn annisgwyl i bawb, fel eglurodd Idris Charles ar y Post Cyntaf: "Ro'n i yn rhyw amau. Roedd yna ryw deimlad yn y ddinas, ryw deimlad ymysg y cefnogwyr.

Ychwanegodd: "Roedd 'wbath yn yr awyr neithiwr, teimlad tebyg iawn i pan wnaethon ni guro Caerlŷr. Ac i ddweud y gwir wnaethon ni ennill y gêm yn hawdd!"

Roedd hi'n noson fythgofiadwy i golwr Casnewydd, Joe Day

Wrth i chwaraewyr Casnewydd ddathlu'r fuddugoliaeth hanesyddol, roedd rhaid i gôl-geidwad yr Alltudion, Joe Day, adael y cae ar frys.

Daeth i'r amlwg bod gwraig Day, Lizzie, ar fin rhoi genedigaeth i efeilliaid.

Roedd y golwr wedi methu'r gêm gyntaf yn erbyn Middlesbrough am yr un rheswm.

Bore Mercher, dywedodd sgoriwr yr ail gôl, Padraig Amond, wrth y BBC fod Mrs Day wedi rhoi genedigaeth i ddwy ferch dros nos a bod pawb yn iach.

Wrth ymateb i'r ffaith bod Casnewydd ar fin herio pencampwyr Uwch Gynghrair Lloegr, dywedodd y rheolwr Mike Flynn: "Mae o [Guardiola] yn feistr yn ei gamp, ac yn rhywun dwi wir yn ei edmygu...

"Fydd rhaid i ni fod yn barod, efallai bydd rhaid i mi chwarae naw o'r hogiau yn yr amddiffyn.

"Mae hi'n anodd disgrifio sut dwi'n teimlo ar y funud. Dwi wedi bod yn poeni'n ofnadwy, nid oherwydd y gêm ond gan fy mod i'n gwybod pa mor bwysig oedd hyn i'r clwb, ac i'r ddinas i gyd.

"Mae'r cefnogwyr yma yn haeddu hyn ar ôl bob dim maen nhw wedi ei brofi. Dwi wir yn caru'r clwb."