Chwe Gwlad: Merched Yr Alban 15-17 Merched Cymru

Er dechrau addawol i ferched Yr Alban gyda chais Konkel, daeth merched Cymru i'r brig wedi diweddglo dramatig

Roedd hi'n fuddugoliaeth munud olaf i ferched Cymru oddi cartref yng Nglasgow nos Wener, mewn gêm agos yn erbyn merched Yr Alban.

Dyma'r gêm gyntaf i dîm merched Cymru ei hennill ym Mhencampwriaeth y Chwe Gwlad eleni.

Er i'r Alban gael dechrau addawol - gyda chais cynnar gan Jade Konkel ac ail gais wrth ei chwt gan Sarah Bonar - llwyddodd Cymru i unioni'r sgôr cyn diwedd yr hanner cyntaf, gyda chais gan Bethan Lewis, a chic gosb a throsiad llwyddiannus gan Robyn Wilkins.

Fodd bynnag, daeth trydydd cais gan Chloe Rollie i'r tîm cartref, ac er bod hi'n edrych yn ddu i'r ymwelwyr, brwydrodd Siwan Lillicrap i sgorio cais arall i Gymru ym munudau ola'r gêm.

Cafodd y cais ei throsi gan Lleucu George, gan sicrhau'r fuddugoliaeth i ferched Cymru.