Pencampwriaeth y Chwe Gwlad: Yr Alban 11-18 Cymru

Josh AdamsReuters

Josh Adams yn sgorio cais i Gymru wedi 13 munud

Bydd Cymru yn mynd am y Gamp Lawn ddydd Sadwrn nesaf wedi iddyn nhw drechu yr Albanwyr o saith pwynt ym Murrayfield.

Roedd yna gryn edrych ymlaen at y gêm wedi i Gymru drechu y Saeson o 21-13 yn Stadiwm y Principality bythefnos yn ôl.

Y tîm cartref a sgoriodd gyntaf ym Murrayfield wrth i Finn Russell sicrhau cic gosb lwyddiannus.

Ond 13 munud i fewn i'r gêm roedd yna gais i Josh Adams ac wedi i Gareth Anscombe drosi'n llwyddiannus roedd y sgôr yn 3-7.

Jonathan DaviesReuters

Daeth ail gais i Gymru gan Jonathan Davies

O fewn munudau roedd yna ail gic gosb lwyddiannus i Finn Russell ac roedd Yr Alban wedi gostwng mantais Cymru i un pwynt.

Ond wedi 24 munud llwyddodd Anscombe i ymestyn y mantais ymhellach gyda chic gosb lwyddiannus.

Hanner awr fewn i'r gêm a chais arall i Gymru - Jonathan Davies y tro hwn - wedi gwaith arbennig o dda gan y blaenwyr. Ar yr egwyl roedd y sgôr yn 6-15.

Cefnogwyr

Rhai o'r cefnogwyr a deithiodd i'r Alban

Roedd ymdrech Yr Alban yn fawr ar ddechrau'r ail hanner ond roedd amddiffyn Cymru yn gryf.

Er hynny yr Albanwyr a sgoriodd gyntaf yn yr ail hanner wrth i Darcy Graham sgorio cais i ddod â'r tîm cartref yn ôl i'r gêm (11-15) wedi symudiad da gan yr olwyr.

Cymru yn colli cyfle yn fuan wedyn a'r Alban yn ennill tir ac yn rheoli'r gêm gyda dim ond 12 munud i fynd.

Yn ystod y munudau diwethaf roedd y gêm yn y fantol ond fe ddaeth cic gosb i Cymru (Gareth Anscombe) a'r sgôr terfynol oedd 11-18.

Seren y gêm oedd Hadleigh Parkes.

Straeon perthnasol